Jowai, Naitung, 27: Ka Khasi Students’ Union (KSU) Lapangap Unit ha ka Thohdieng jong ka taïew baladep ka la shong ban ïa phyllïew jingmut hadien ba ki nongrep jong ka shnong Lapangap, ka shnong kaba don ha khappud ka West Jaiñtia Hills District, Meghalaya bad ka West Karbi Anglong District, Assam, ki la pynsngew sha ki nongïalam ba hakhliehduh jong ka KSU ïa ki jingeh kaba ki la mad.
Ki nongrep ki la pynsngew ha ka KSU ba haduh mynta mynne ruh ki dang don ki nongrep kiba ym lah ban thung pyndep ïa u kba bad kaba sngewsih ka long ba kiba ladep ruh ban thung kim ïoh shuh ban leit sumar bad pynbiang um ïa u kba namarba kim sngewshngaiñ ban leit sha ki lyngkha jong ki namar ka jingpyndik jong ki Pulit Assam bad ki jaidbynïew Karbi ka dang ïai bteng haduh mynta myne.
Na ka liang ka Seng ka la kular ban buddien ïa kine ki jingeh ba ki nongrep jong ka shnong Lapangap ki ïakynduh bad ka seng ka kular ba kan don ha syndah bad ki nongshong shnong jong ka shnong Lapangap bad kiwei de ki shnong kiba shah ktah khang ban pynïoh ïa ka hok jong ki kum ki trai ri bad ki dei hok ban leit rep bad ïaid laitluid ha la ka jong ka khyndew ka shyiap.
Ha kane ka sngi, ka KSU Lapangap Unit ka la pynskhem ruh ïa ki nongkitkam na ka bynta ka samoi treikam jong u snem 2025-2028 ha kaba la sakhi lang da u President ka KSU Central Executive Council u samla Lambokstarwell Marngar, ki dkhot ka KSU Central Executive Council, ki nongïalam ka KSU West Jaiñtia Hills District Unit, ki dkhot jong ki shnat treikam na ki thaiñ Khappud ka Assam bad ki nongïalam shnong.
U samla Lambokstar haba kren ha kane ka sngi ula kitbok kitrwiang ïa ki nongïalam kiba shah jied thymmai ba kin long ki samla kiba bat ïa ka akor ka burom bad khamtam eh ban ai ka jingïatrei lang bad ki nongïalam shnong.
U la kyntu ba kim dei ban long ki mawjynthut ha ka shnong ka thaw hynrei ki dei ban long kiba don ka jingkitkhlieh ban ïa kit ïa bah ïa ka eh ka shon ha ka shnong ka thaw khamtam ban ïaibteng ban shakri khambha ïa ka thaiñ baroh kawei.
La sakhi lang ha kane ka sngi da u Waheh Shnong ka shnong Lapangap u Bah Deimon Lyngdoh, Bah DS War, ki nongïalam jong ka KSU Central Executive Council ba kynthup ïa u samla Shiningstar Kharbihkhïew, u samla James Hitler Mawphniang, u samla Lenningrad Tariang.
