Shillong, Ïaïong 18: Ka jingïalang jong ka kynhun ki shipai Border Security Force (BSF) bad ki Border Guard Bangladesh jong ka Sector Commander Level Coordination (SCLC) kaba la long ha ka kyrdan jong ki Commander la pynlong ha Bijoypur ha Bangladesh.
Ha kane ka jingïalang la ïakren ba kumno ban tehlakam ïa ki kam sniew ha khappud hapdeng kine ki ar tylli ki ri, ban pynneh pynsah ïa ka shongsuk ha khappud hapdeng ka Ri India bad ka Bangladesh.
Ha ka kyrwoh la ïathuh ba ha kane ka jingïalang na ka liang jong ki BSF la lamkhmat da u Deputy Inspector Genenral (DIG) u Lalit Mohan Sharma ba dei peit ïa ki bynta jong ka Garo Hills Tura, la donlang u Manoj Kumar Barnwal, DIG jong ka Shillong Sector.
Kaba na Bangladesh la don u Sector Commander jong ki BGB Mymen Singh Sector, u Colonel Sarker Mohammad Mostafizur Rahman, ki battalion commander bad kiwei ki ophisar.
Ha kane ka jingïakren ki la ïa ban jur ha kaba ïadei bad ki kam sniew ha khappud hapdeng kine ki artylli ki bad ka jingwan rung beaiñ bad ïa kane dei ban ai jingtip mar kylliang ha ka por kaba biang kumno ban lah ban pahara ïa pud u sam.
Ha kane ka jingïalang ïakren ruh ïa ka jingïatreilang ban ïakhun pyrshah ïa ki kam sniew ha khappud hapdeng kine ki artylli ki ri, kum ka jingkhaiñ beaiñ, ka jingïarung ïamih beaiñ ki briew.
Na baroh ar liang ki BSF bad ki BGB kila pdiang ïa ka jingdonkam ban ïatreilang ha ka jingïakhun pyrshah ïa ki kam sniew da kaba ïa ai jingtip markylliang ha ki por kiba biang bad ïa ka jingïalang la pynkut da ka jingïakular ba baroh ar ki kynhun shipai ban don ka jingïasngewthuh bad shaniah kaba markylliang ban pynneh pynsah ïa ka shongsuk shongsaiñ.
