Kubur u Myntri rangbah ba slem pynlait pisa kaba T. 700 klur sha ki kongtraktor ba pyntrei JJM

Shillong, Nohprah 09: U Myntri Rangbah ka jylla u Conrad K Sangma ha ka sngi baar u la pdiang bad kubur ïa ka jingpynslem haba ïadei bad ka jingpynlait ïa ka bill ki kontraktor kaba long palat T. 700 klur kiba pyntreikam ïa ka Jal Jeevan Mission (JJM) project naba ka sorkar pdeng ka la rai ban pynsangeh ban pynlait ïa ka pisa sha baroh ki jylla.
“Ka pisa na ka bynta ka JJM la pynsangeh da ka sorkar pdeng na ka bynta baroh ki sorkar jylla. Kumta kam shym la don ka pisa kaba la pynlait sha kino kino ki jylla kumba long mynta. Ym tang ïa ka Meghalaya, hynrei ha baroh kawei ka ri,” ong u Sangma.
U Myntri Rangbah u la batai ba ka JJM ka dei ka mission mode programme kaba la dei ban kut ha u bnai Lber 2024, bad ka Union Cabinet ka la rai ban khang noh ïa ka. Hynrei hadien pat ka Cabinet ka la rai ban pynjlan biang ïa kane ka programme tat haduh ba ki project kiba dang ïaid kin pyndep lut, kaba ïaid lang bad ka jingleh audit ïa ki scheme kiba la pyntreikam ha baroh kawei ka ri.
“Ka union cabinet ka la buh ki kyndon ba donkam ban leh audit kaba dei ban leh ïa baroh ki scheme kiba la pyntreikam ha baroh kawei ka ri, bad tang kawei ka jingleh audit kaba dei ban pyndep na ka bynta baroh ki scheme, bad dei hangne ba ka finance ministry, halor kane, kan sa pynlait ïa ka pisa,” ong u Sangma.
U Sangma u la pynthikna ba kane kam, kam dei beit thik tang ïa ka Meghalaya bad ka sorkar pdeng kan sa pynlait ïa ka pisa shisien ba la pyndep ïa ka audit.
“Namar kata kam dei tang ha jylla Meghalaya marwei, kadei ha baroh kawei ka ri, bad ngi khmih lynti ba baroh ki kam yn sa lah ban pynbeit, ki la don ki rai, bad ka jingkylli ka dei tang ka jingpyntreikam kaba khatduh kaba dang ïaid, bad ka audit ka long kaba la pynlong kongsan da ka Union Cabinet jong ki skhim ba dang ïaid,” u la bynrap.