Jowai, Nailar, 10: Ka Pnar Student Movement (PSM), Central Body, ha ka jinglam khmat u President ka seng u samla Embhah Passah, ha ryngkat u General Secretary samla Leo F Suiam lem bad ki dkhot ka seng, ha ka sngi Saitjaiñ ki la ïa kynduh ïa ki heh ka Jio kiba la wan na Guwahati, Shillong bad ki Incharge ka Jio kiba doh hapoh ka Jaiñtia Hills baroh kawei.
Ha kane ka jingïakynduh na ka liang ki heh jong ka office Jio, ki la kubur ba don ka jingbakla ka jong ki ha ka jingïadei bad ka jingbym shim khia ka jong ki halor ka jing ujor ka seng ha kine ki sngi kiba la dep.
Kumta ha kane ka jingïakren ka seng ka la buh por ïa ka Jio ban pynbiang ïa ka Network hapoh shi taïew, ha kaba na ka liang ki nongtrei ka Jio ruh ki la kular ban don da ka Joint Inspection ryngkat bad ki dkhot ka seng na ka bynta ban pynbiang ïa ka Network Jio kat kum ka jingdonkam jong ki paidbah.
Katba na ka liang ki nongïalam jong ka PSM ki maham ban khang tala shi syndon ïa kane ka office Jio ha Jowai, lada kam shim khia ïa katei ka por ba la buh da ka seng.
