Shillong, Nailur 02: Ki bor treikam ka MBoSE ha Shillong, ki la kubur ba ka la don ka jingbakla ha kaba ïadei bad ka jingpynhap ïa ka Eastern West Khasi Hills District ha Garo Hills Division ha ka kot pule Social Science jong ki Class X.
Kane ka long katkum ka jingïathuh u Bah Shembor Langrin, General Secretary ka HYC, North West Khasi Hills District Unit.
U Bah Shembor, u la ïathuh ba Seng hadien ba ka la ïohi ïa kawei ka kot pule jong ka Meghalaya Board of School Education ha ka subject Core Social Science na ka bynta ki Khynnah Class X ha ka Jylla , ha kaba ia ka District thymmai ka Eastern West Khasi Hills la thoh ba ka don ha ka Division sha Garo Hills ka la leit ban kynduh bad u Joint Director ka MBOSE halor kane bad na ka liang jong u, u la kubur halor kane ka jingbakla bad u la kular hakhmat ka Seng ba na ka bynta kane ka jingbakla ka MBOSE kan shim khia kloi bad na ka bynta ka sien shon kaban wan yn pynbeit noh ba ka Eastern West Khasi Hills kam dei sha Garo Hills hynrei ka dei hapoh Khasi Hills.
Ka HYC ka pynrem jur ïa ka MBOSE, wat lada kadei makna kaba rit ba ria hynrei kane ki lah ban ïalam bakla pat ha ka pyrkhat pyrdaiñ jong ki Khynnah pule. Ka Seng ka kyntu ïa ka MBOSE bad ïa ka tnad pule puthi ba lada ki pynmih ïa kino kino ki kot pule ba bynta ki Khynnah pule hapoh ka Jylla ki dei ban da leh bad peit bniah ba kan ymdon kano kano ka jingbakla kaba lah ban wanrah ka kulmar bad ïalam bakla ïa ki Khynnah pule ha ka Jylla.
