Kubur ka Kur Syiemiong Kpoh Meba na ka bynta ka Khasi Tribe Certificate lyngba ka tang jait

Shillong, Nailur: Ka Executive Committee jong ka Kur Syiemiong Kpoh MEBA kala phah da ka jingthoh sha ki bor ka Registration Authority ka Khasi Hills Autonomous District Coucil, ha kaba ïadei bad ka jingkubur (Recommendation) na ka bynta ka Khasi Tribe Certificate.
Ka EC ka Kur Syiemiong Kpoh MEBA ka pyntip ba hadien ba kala tohkit bad bishar bniah bha ïa baroh kiei kiei kiba ïadei bad ki kam tang jait, kynthup ïa ki kot ki sla, kumta la aibor ïa u Kñi jong u Suraj Syiemiong ba dei u kpa u “Kendrick” ba shong ba sah ha Umiam Block-II, Ri Bhoi District, ban pyndep ïa ka jingtang jait ba la buh katkum ki kyndon ka KHADC (Khasi Social Custom of Linage) Act, 1997.
La pyndep ïa ka jingtang jait ha ka 27.08.2022 hapdeng ka jingïadon lang jong ki kmie ki kpa, ki hymmen ki para, ki kñi, ki rangbah kur na ka Kur Syiemiong, ki nongkitkam ka Kur Syiemiong Kpoh MEBA bad kumjuh ka jingïadon lang u Rangbah Shnong Durbar Shnong Umiam, Ri Bhoi District.Ka jait kaba la tang ïa u Kendrick ka dei ka jait “Kharnongthommeba.”
Kumta, na ka liang ka Kur Syiemiong Kpoh Meba kam don kano kano ka jingpyrshah ba u khun jong u Bah Suraj Syiemiong bad Kong Nongthombam Shadani Devi ba kin ïoh ïa ka Khasi Tribe Certificate na ka District Council, bad ka Kur ka ai ka jingkubur (Recommendation) kaba khlaiñ halor kane ka kam hadien ba ki la pyndep ïa ka jingtang jait katkum ka KHADC (Khasi Social Custom of Linage) Act, 1997.Kane kalong katkum u kyrwoh lyngba u Bah John P Syiemiong, General Secretary Seng Kur Syiemiong Kpoh Meba.