KSU sha ki 59 ngut ki MLA: Leit noh sha Delhi wat sahkut tang ha ki ktien, ki shithi bad ki kular

By Mawphor Editor On Nov 20, 2024

Shillong, Naiwieng, 19: Ki mat ki jura ka jaidbynriew ki mih beit man ka sngi, tangba ka eh ban ïa syllok bad ka Sorkar namarba ki heh Sorkar ki bunkam shabar khamtam sha nongbah Delhi. Ka Delhi ka dei ka shnong pdeng ka Sorkar India, kaba hangne ki rai ïa ki mat la yn pynbha ne yn pynsniew ïa kano kano ka bynta ka India bad wat ban rai la yn shu sngap beit, ieh beit, dep shato beit ïa kino kino ki jingjia ha India, la kynthoh ka Khasi Student’s Union (KSU) ïa ka jingmih ki kynrum hapoh ka skulbah NEHU.
“Ki ïarmangkalai la jied ban mih khmat ïa ki paidbah, ka dei ka kamram ka jong ki ban ïa said ïa ka ïap ka im u paidbah ha la ka jong ka jong ka jylla ha khmat ka Sorkar Pdeng,” ong ka KSU ha u kyrwoh ba la phah da u General Secretary u samla Donald V. Thabah haba kyntu ïa ki nongmihkhmat ka Jylla ban shimkhia halor ka jingeh jong ki samla pule ka skulbah NEHU.
La khatsaw sngi lynter la shah thngan ki samla pule ka NEHU ban wanrah ïa ki jingkylla ka NEHU, ki jingkylla ban ai jingmyntoi bad jingshakri ba pura ïa ki samla pule bad nongwad kam ha jylla, hynrei na ka liang ki ïarmangkalai ki sngap jar jar lane ki shu kut tang ha ka ktien khlem ïohi kam shano shano ruh, la kynthoh ka KSU.
Napdeng ki 19 ngut ba shah thngan jan baroh ki la poi hospital lut, ka met kine ki samla ba dang lung ka rta ka la khrew, ka jingpule ka jong ki la ktah, ki kmie ki kpa bad ki bahaiing jong ki, ki jaw ummat man ka sngi, tangba phewse ba ka jingïakhih ka jia por tlang, ka por tamasa, ki ïarmangkalai kim lah ban leit Delhi ban dawa ïa ka hok u paidbah namar hap ïa don bynta ha ki kam tamasa kiba laiphew jait. Kat haduh mynta ym pat don uwei u ïarmangkalai ban leit sha Delhi ban dawa ïa ka hok ki samla pule ka NEHU. Ïoh lehse ka NEHU kam dei ka jaka ban phah pule ïa ki khun ki heh ki haiñ, kumta ym don jingpyrwa tang khyndiat ruh, la kren bynñiaw ka KSU ïa ka jinglong jingman ka koit ka khiah jong ki samla pule kiba shah thngan.
Ka jingshah jingit ki samla pule ka NEHU ba la lam khmat da ka NEHUSU bad ka KSU NEHU Unit kam dei na ka bynta ka myntoi shi met, hynrei ka dei na ka bynta ka myntoi ruh ïa baroh lang kaba kynthup ïa ki nongtrei hangto, ki samla ba pule ha ki kolej ba pynïaid ka NEHU bad khamtam ruh ïa ki pateng ki ban wan la ka dei ha ka kam ka jam ne ka Admission pule, ong ka seng.
Haba kynthoh ïa ka jingmynthi jong u Vice Chancellor u Prof. PS Shukla ka KSU ka la ong, “ki kam ki jam la bat lut ki nongwei kiba ym don ka sap ban pynïaid ïa ka NEHU, ki don ki kam kiba haduh mynta khlem pyndap namar ba bishni ban ïoh ki trai jylla, ki jingdonkam (infrastructure & equipments) ha ki departments ba pher bapher ki duna haduh katta katta bad u VC lem bad ka kynhun jong u kim sngap ïa ka jingud jingnam ki samla pule, ki nonghikai bad nongtrei mynta la bun bun snem. “
Ka KSU ka la peit sani bha mynta la 14 sngi ïa ka jinglong jingman ha NEHU. Ka la ïohi ïa ka jingtyrha ki samla pule khamtam kito ki ba shah thngan, ki la shu im ha ka drip, ki injections, electrolytes, glucose bad ORS. Kine ki samla pule ki dang khynnah. Ki shu poi hospital khah khah na ka jingshah jingit. I Chief Medical Officer ka NEHU mynne i la pynpaw ïa ki jingma ki ba ap ïa kine ki samla ba shah thngan kiba lah ban ktah wat hadien. U Kevin Nelson Wanrap, GS KSU NEHU Unit u la poi hospital biang ha ka sien kaba ar abd mynta ka kynti ki doctor ha Civil Hospital ki la ai syndon da ka oxygen ba um lah ring mynsiem shuh. U Sandy Sohtun, President NEHUSU u la ïoh pang ha ka nierbah namar kane ka jingshah thngan hynrei u ïai bteng beit ïa ka jingïakhih. Sa katno pat ngin shu sngap? Ngin ap haduh da ïap briew ne ko sorkar.
Mynta ka KSU ka buh jingkylli ïa ki politicians, ki ministers, ki MPs, hato phin shu ïa thoh shithi? Hato phin shu ïa phone? Hato phin shu wan sngewlem? Hato phin shu ïa sngap jar? Kan eh aiu ba phin leit tur baroh 59 ngut sha Delhi? Haba phi ïa smat leit Delhi khah khah ha baroh ki aïom. Lane ïoh lehse ka kam ha NEHU kam phoida eiei ïa phi baroh 59 ngut namar ki bahaiing jong phi ki pule lut shabar? la bynrap ka KSU.
Ka KSU kan ym lah ban shu sngap, hynrei lada ki nongmihkhmat kim lah ban pynbor ïa ka sorkar pdeng khamtam ïa ka Ministry of Education ban pynbeit ïa ki kynrum kynram ha NEHU da kaba weng noh ïa u Prabha Shankar Shukla, ka seng kam banse ban hap shim noh da kiwei ki sienjam ban pynsngewthuh janai ïa ki shkor ba kyllut ka Sorkar Jylla bad Sorkar Pdeng.