Nongpoh, Naitung 31: Na ka liang u Bah George B. Lyngdoh kum u nongmihkhmat na Ri Bhoi bad uba dei ruh u State Vice president ka TMC party u la kren shai ba ka jylla Meghalaya ka la duhnong shisha halor ki kam pynbeit pud pynbeit sam hapdeng ka Meghalaya bad ka Assam.
U Bah George B. Lyngdoh u la kren ruh ïa kitei ki kyntien ba ka jylla Meghalaya ka la duhnong halor ki kam pynbeit pud hadien ba la dep ïasoi ïa ka MOU, ka dei ha ka jingkren kaba u la pdiang burom ïa ki nongïalam ka BJP bad kiwei ki party kaba la long ha ka jingïalang ha Patharkhmah ha ka sngi Saitjaiñ ba la dep.
Kum ban pynkynmaw, na ka liang ki MP ka TMC ryngkat ki nongïalam ka TMC na Meghalaya dang shen ruh ki la ïa shong hakhmat ka parliament ban dawa pynduh noh ïa ka MOU ba la ïasoi hapdeng ka sorkar Meghalaya bad ka sorkar Assam halor ki kam pynbeit pud bad kumjuh ruh ban dawa na ka sorkar pdeng ba dei ban pynrung noh ïa ka ktien Khasi bad Garo ha ka khyrnit ba phra jong ka riti synshar ka Ri India.
U Bah George B. Lyngdoh u la kren shai ruh ba ka Party TMC na ka jylla ka pyrshah jur ïa ka jingïasoi ïa ka soskular halro ki kam pynbeit pud hapdeng ka Assam bad ka Meghalaya bad dei namar kane ka daw kum ki nongïalam ki mih pyrthei ban pyrshah bad ban dawa ba dei ban pyndam noh ïa ka MOU ba la dep ïa soi halor ki kam pynbeit pud.
“Ki jingshisha kiba ka jylla ka duhnong halor ki kam pynbeit pud, ka dei ruh ba wat ki trai jylla kiba shong basah ha ki shnong khappud kum ha Maikhuli, Malangkuna bad kiwei ki shnong khappud ki da pyrshah jur ïa ka MOU ba la dep ïa soi bad ka daw hi ka long ba bun ki jaka jong ka Meghalaya la ïoh ban klun suk da ka sorkar Assam” ong u Bah George B Lyngdoh.
Shuh shuh, u la pynshai ruh da kaba ong ba kane ka kam pynbeit pud pynbeit sam ka dei kaba la neh mynta la jan 50 snem ei ei bad kam long kaba suk ban shu shim rai jubor khlem da bishar bniah bad lada kren ïa ka kam pynbeit kum kumba la leh ka sorkar MDA hapoh ka jylla kam da don kata ka jingeh namar ïa ka rai la shim tang ka sorkar khlem da bishar bniah na ki trai jaka, ki nongsynshar shnong, ki nongsynshar Hima kiba dei hok ban tip halor ki kam jaka puta, u la bynrap.
