Jowai, Naitung 06: U ma O.R. Challam haba pynsngew shaphang ka jinglong jingman jong ki surok kiba don ha kylleng ka sor Jowai bad hapoh ka Ri-Lum Jaiñtia hi baroh kawei, ula kren da ka jingbynñiaw ba ka sorkar kam shem la ïohi eiei ïa kine ki jingeh ba ki paidbah ki ïakynduh manla ka sngi ha ka ïaid ka ïeng.
Ïa kane u ma Challam uba long u President ka Seiñ Raij Jowai ula pynsngew ha ki lad pathai khubor halor ka jingsniew palat ki surok ha Jowai kiba la dap satang da ki thliew ki sar, kaba phylla shuh shuh ka long ba tang hadien tang katto katne bnai ba la dep maramoh kitei ki bynta ki la sdang biang ki jingjulor kumjuh?.
Ula buh ruh jingkylli ïa ka tnad PWD balei mo ba kane ka rukom pyntrei surok kam shem la neh slem da ki snem, hynrei tang katto kate bnai kila sniew biang bad kane ka long ka jingkylli kaba heh bha ïa kiba bun balang.
‘Ym tang hapoh sor hynrei wat sha ki bynta jong ka surok bah NH-6 na Jowai sha Shillong bad sha kiwei de ki bynta jong ka surok bah hapoh ka Ri-Lum Jaiñtia ka jingsniew ki surok ka long shaba palat bad kane ka ïoh lad pynban ïa ki briew nabar ban kdew kti ïa ka District bad ïa ka jylla hi baroh kawei’, ong ma Challam.
Ka shad Behdeiñkhlam mynta ka snem ka la sdang noh sa tang khyndiat sngi bad la sakhi ba ka tnad PWD kala maramot ïa ka surok na Mission Compound shaduh Iawmusiang bad kane ka rukom maramot surok ruh kam long kaba biang hynrei la shu leh tang ban dep.
Shuh shuh ula ong balei ba ka sorkar kam shimkhia satia ban pyntrei da kaba jania bad kaba lah ruh ban neh haduh 2 snem tam eiei hynrei ka sorkar lyngba ki nongpyntrei Contractor kila shu leh tang ban dep bad wanrah biang ïa ka juh ka jingeh.
Ula pynsngew ‘manla ka snem kum ka Seiñ Raij Jowai kala hap beit ban thoh ïa ka shithi sha u EE ka PWD na ka bynta ban maramot ïa ki surok’, kumta u buh ka jingkyntu khnang ban lait na ki jingshah kdew kti khamtam ïa ka tnad PWD la dei ban shimkhia bha ïa kane ka kam.
