Nongpoh, Lber 30 : Ki nong Assam kiba dei na ka Shnong Bengali Basti, ki la wan thombor ïa u Rangbah Shnong ka Maikhuli lem bad ki arngut ki khun shynrang nalor uwei pat ki Nongkitkam Shnong kum ka jingpynhiar kput ïa ka jingïoh thung post elektrik ka MeECL hajan ka pung dohkha ka Shnong Maikhuli, kaba don hapdeng ka jingïakajia pud.
Une u Rangbah Shnong ba shah thombor u dei uba tip kyrteng u Nicholas Marak. Arngut ki khun jong u ruh kil a shah thombor lang kiba kyntnup ïa u Sangwat J Sangma bad u Ricky J Sangma nalor uwei pat ki nongkitkam shnong ba kyrteng u Ajitabh Barman.
Haba ïakren bad u Nicholas Marak, la ïathuh ba kine ki briew na Bengali Basti kiba don da ki phew ngut, ki la wan ban thombor ïa u bad ïa ki khun ha ka por shiteng sngi jong ka 29 tarik Lber.
U kynnoh ba kane ka jingwan thombor ka dei na ka daw ka jingkyrshan jong ka Shnong ïa ka jingwan thung post electrict dang shen ka MeECL hajan ka pung ri dohkha ka shnong Maikhuli. Ula kynnoh ba kane ka dei ka jingpynhiar kput ïa ki nongïalam shnong ka Maikhuli.
U Nicholas u pyntip ba kine ki briew ki thombor shuwa ïa ki khun jong u bad hadien kane, ki la bthah ïa u shimet ba un wan mih sha ka jaka ba ki don bad haba ula leit ryngkat u Ajitabh Barman, kine ki briew ki la thombor lang ïa ki. U ïathuh ba da ka jingïakhun dohiap, baroh saw ngut ki la ïoh ban phet krad noh na katei ka jaka.
Halor kane ka jingjia, u MLA ka Jirang Bah Sosthenes Sohtun ula bthah ïa ki Pulit ka Ri-Bhoi ba kin leh eiei bad ban shimkhia ha ka ban ai jingïada ïa ki nongshong shnong nalor ban pynthikna ruh ïa ka shongsuk shong shngaiñ ha ka shnong Maikhuli.
ïa kane ka kam thombor la ujor ejahar ha Basistha Police Station, Assam bad ka jingtohkit mynta kala ïaid shakhmat.
