Kordit ki nongleit nongwan ba twa bad shlei um bun jaka ha East Jaiñtia Hills District

Khliehriat jylliew 15: Namar ka jingther jur palat u slap, ka la don ka jingtwa ki lum, ka jinghap ka khyndew ha kiba bun ki jaka ha East Jaiñtia Hills District bad kane ka wanrah ïa ka jingthut ha ka leit ka wan jong ki paidbah, ka jing hap ki maw jinghap khyndew ka jur bha ha ka thaiñ Narpuh kata naduh Sonapur ter ter bad ha shnong Daistong kaba hap ha Saipung C&RD Block.
Ka jing twa khyndew ka la wanrah ïa ka jingdheng kali kaba jur bha khamtam ha ka surok bah ha Narpuh ha kaba kat haduh ba thoh ïa kane ka khubor ki kali heh bad ki kali rit ki dang sahkut ha ka jingdheng kali bad don ruh ki jaka ba lait tangba ki kali jingïaid tang shi liang ka surok.
Na ka liang ki nongtrei jong ka National Highway Authority of India ki la iakhun katba lah ban pynkhuid kham kloi ïa ka khyndew, ïa ki dieng, ki maw kiba hap ha surok.
Ka la don ruh ka jingdap um ka surok ha ki katto katne ki jaka ha jan Lumshyrngam namar ka jingdap bad jingshlei um ka wah Lyteiñ, kane ka jingshlei um ka wah ka ju jia man ka por ha ka por ba ther jur u slap bad kane ka ju buh jingeh ïa ki paidbah ka thaiñ kiba dei iaid lyngba na Lumshyrngam, ki shnong kiba dei ban iaid lyngba na kane ka jingkieng wah Lyteiñ ki kynthup ka shnong Lumshyrngam, Daistong, Bam Khoo sngi, Saipung bad ki shnong kiba don ha ki thaiñ Saipung bad kiwei kiwei.
Nalor ka jing shlei um ka wah Lyteiñ, ka la don ruh ka jingtwa khyndew bad jing hap ki maw ha surok iaid kali ha shnong daistong, hynrei wat hapdeng ka jingshah kah lynti ha ka um, ki thymmei khubor ki ïathuh ba ki nongtrei jong ka tant public Works Department East Jaiñtia Hills District, ki la lah ban poi sha ka shnong Daistong ban pynkhuid ïa katei ka jingtwa, hynrei namar ka jingther jur u slap kaba khlem sangeh, ki nongtrei bad ki nong ñiah puh shilum ki shem jingeh ban pynkhuid ïa ka surok namar katba nang pynkhuid ka khyndew ruh ka nang hap namar ba jur u slap.
Kane ka juh ka jingeh ka jia ruh ha ki thaiñ Narpuh, ha kaba na ka daw ka jingther jur u slap ka khyndew, ki maw, ki dieng ki hap khah khah bad kah lynti ia ka surok bah, na ka liang ki bor pulit jong ka Lumshnong Police Station bad ki nongtrei jong ka NHAI ki ïaleh katba lah ban pynsuk ïa ki nongleit nongwan.
Kumta, na ka daw ka jinglong jingman ka surok national highway bad ki surok ha East Jaiñtia Hills District kaba na ka daw ka jingjur palat u slap, na ka liang ka tnat pulit jong ka East Jaiñtia Hills District bad na ka liang ki bor synsgar district, ki kyntu jur ïa ki nong ñiah kali bad ki nongleit nongwan ba ki dei ban long adkar bad sumar bha ban nym ñiah stet than ïa ki kali bad ban long phikir ha ka leit ka wan, namar ka jinghap khyndew, jing hap ki maw, ki dieng ka lah ban jia ha kano kano ka por.