Shillong, Jymmang 11: U National General Secretary ka All India Trinamool Congress (AITC) Abhishek Banerjee hynne ka sngi balang ula ongba ka AITC kan sa pynliem ïa ka Bharatiya Janata Party (BJP ha Tripura bad ka paralok jong ka-ka National Peoples Party (NPP) ha Meghalaya ha u snem ban wan.
Ha ka jingleit iuhkjat jong u ha Assam, u Abhishek ula sdang ïa ka jingïaid lynti da kaba leit leh burim ha Kamak shya temple bad iasyllok bad ki nongtrei ka party ha Machkhowa. Hadien kane, ula leit plie ïa ka Ophis jong ka Assam Trinamool Congress ha Jan Path, Jayanagar.
Haba ïakren bad ki lad pathai khubor, u Abhishek ula ong ba ka thong ba hakhmat eh jong u ka long ba ka AITC kan nang khlaiñ kum ka political party ha ki 10 tylli ki Jylla kynthup ka thaiñ Shatei Lam Mihngi.
“Ka AITC kala long ka Kynhun liang pyrshah ha Meghalaya. Tang khyndiat taiewm ngi la thaw ïa ka State Com mittee ha Tripura bad ha u snem ngin ïakhun ïa ka elekshon MLA ha Tripura bad Meghalaya kat ka bor ba ngi don bad ngin pynliem ïa ki BJP ha Tripura bad ka NPP ha Meghalaya” ula ong.
Haba kren paidbah ha ITA Machkhowa, une u Nongïalam ka AITC ula pynrem jur ïa ka Sorkar arsap ka Assam bad ong “ Khie leit kylli na ka Sorkar Jylla ïa kaei kaba ka Sorkar kala leh na ka bynta ki nong Assam. Ki paidbah ki dang hap hiar sha Kolkata ban ïoh jingsumar. Lada ka Didi ka lah ban leh ha Bengal, ka lah ban leh kumjuh ha Assam”.
Une u Nongïalam ka AITC ula kyntu ïa ki Jylla ka thaiñ Shatei Lam Mihngi ba kin iatylli kawei khnang ba kin lah pynliem noh ïa ka BJP.
