Shillong, K’Lyngkot 11: U nongïalam ka liang pyrshah u Dr Mukul Sangma u la kop ïa u Symbud Myntri Rangbah ka jylla u Bah Prestone Tynsong ban ïatai nia ha kaba ïadei bad ka jingthaw ïa ka ain kaba la tip kum ka Meghalaya Residents Safety and Security Act (MRSSA).
Kane ka jingkop jong u Dr Mukul ïa u Bah Prestone kadei halor ka jingkynnoh u Bah Prestone Tynsong ïa ka sorkar ba la ïalam da ka Congress ba kam shym la kdew ha ka original act ne ka ain tynrai ha kaba iadei bad ka jingbuh ïa ki jaka rung jaka mih ne ki entry-exit points bad u la bynrap ruh ba ha ka por ba thaw ïa kane ka ain u Bah Prestone u don bynta lang.
U Sangma u la ong ba u symbud myntri rangbah ka jylla u Bah Prestone u la thok ïa ki paidbah jong ka jylla bad kumjuh ruh ïa ki paidbah jong ka Pynursla Constituency kiba la pynkop ïa u kum u nongmih khmat.
Une u Nongïalam ka Liang Pyrshah u la ong ruh ba kane ka sorkar ba mynta kam kwah ban pyntreikam ïa ka MRSSA, namar katkum ka jingbthah jong ka aiñ, ki CCTV ki dei ban buh ha baroh shilynter ki surok bah jong ka jylla bad national highway.
“Ki kwah ban ailad ïa ka jingtih beain ne illegal mining bad ka jingkit jingbah beain bad namar kata balei kim pyntreikam ïa kane”, u la kynnoh.
U Sangma u la ong ba ha ka khyllipmat ba la pyntreikam ïa ka ain ha ka met bad mynsiem jong ka jingkit beain bad ka jingtih dewiong ka lah ban jia.
