Shillong, Jylliew 5 : U President jongka Meghalaya Pradesh Congress Committee (MPCC) u ma Vincent H Pala u la kob ba ka Congress kan jop palat ïa ka 30 ngut ki MLA ha ka election MLA 2023.
U la ong “ Ka party kan pynïakhun na baroh 60 tylli ki constituency bad ym don jingartatien ba kan jop palat ïa ka 30 seat namar na kitei ki 60 constituency ki don haduh 36 bad 37 tylli ki constituency kiba ka Congress ka dang khlaiñ bha” ong u ma Pala.
U la ong ba ka saiñ pyrthei ka long kaba kylla bad ïa kane yn sa ïohi ha kine ki khyndiat bnai ban wan. U la ong “ Ki paidbah haka jylla mynta ka kynti ki la ngiah hi shoiñ ïa ka National Peoples’ Party (NPP) kaba ïalam ïa kane ka sorkar MDA. Na kata ka daw ka Congress ha kane ka kynti kan pynïakhun da ki kyrtong kiba dang khuid bad bym don ka jingthoh bria bad kiba la biang ruh ka kyrdan jingpule. “ Na kata ka daw ngam don jingartatien ba ngin jop palat ïaka 30 ngut ki MLA. Ka por ruh ka dang kloi than ban ïathuh lypa mano na ki seng saiñ pyrthei ban jop bun eh ha ka election 20203” ong u ma Pala.
“ Ngam ngeit ha ki jingïathuh lypa namar ka election ka dang kham jngai sa kumba 8 bnai ei ei. U la ai nuksa ruh ïa ka Manipur da kaba ong ba kiba bun kim shym la poi pyrkhat ba ka BJP kan jop bun eh. U la ong hangne ha Meghalaya ruh kan ym don jingktah ïaka Congress tang namar ba ki MLA jongka ki phet lut namar baroh ki nongïalam kiba mynshwa ki long kum kita ki ksuid” ong u ma Pala
U la ong kumne da kaba ai nuksa ïa kawei ka jingïalang ha nongkyndong ba haba kawei ka longkmie ka la kylli na u ma Pala balei ki nongïalam (MLA) ka Congress ki la shah thied lut ha ka sorkar bad phet noh na ka party tang shu shimti ma u ïaka kam President. La ïeng uwei u tymmen uba la 95 snem ka rta ba u la ong “ Shah ngan jubab ma nga naka bynta uma Pala haba u Joy u don bad ka Congress haba u duwai baroh ki ksuid ki la phet lut bad lehse ngi la wan sha kane ka party namar don kiba duwai hynrei ki ksuid pat ki phet krad lut. Kumta nga sngewthuh ba teng teng ngim sngewthuh ïa ka plan jong U Blei. Lehse ka dei ka jingïalam jong u Blei ba kine kiei kiei ki jia ha kane ka jylla Meghalaya khnang ba ki dur khmat kiba thymmai kin ïoh ban mih bujli namar ngi donkam ïa ki briew kiba thymmai, ki jingmut jingpyrkhat kiba thymmai kiba don ka bor jingmut bad jingïohi jngai bad ka dei kane ba ka Congress ruh ka buh thong mynta” ong u ma Pala.
U ma Pala u la ong ka Congress kam dei ban khuslai ïa kiei kiei kiba la jia namar kiei kiei kiba la jia dei ban kmen namar ki ju jia na ka bynta kaba bha tam bad ka dei da ka bor jong U Blei.
