Kob u Himanta ba ka Block I bad II kin hap beit sha Karbi Anglong : Pynkhreh buh Battalion ha Lapangap

Shillong/Guwahati, Risaw 19 : Wat la ka jingïakren pynbeit pud hapdeng ka Meghalaya bad Assam ka dang ïaid shakhmat bad halor ka Block I bad II ym pat tip la kan hap sha Meghalaya ne sha Assam namar ka jingïakren ka dang ïaid hynrei u Myntri Rangbah ka Assam u Himanta Biswa Sarma ula da pynbna ba ka Sorkar Assam kan sa sieh maw pud noh kat kum ka Notification ka Sorkar Assam ka la pynmih ha ka 17 tarik Naiwieng 1951, ban pynthikna ba ka Block-I, II kin hap beit ha West Karbi Anglong hapoh u pud u sam ka Karbi Anglong Autonomous Council (KAAC).
U Himanta ula pynbna ïa kane ha ka jingïalang bad ki Seng jong ki paid Karbi kaba long hynnin ka sngi Saitjain hadien ka jingjia umsnam ba dang shen ha Tapat hajan Lapangap kaba la wanrah ka jingduh ïa kawei ka mynsiem briew.
U Myntri Rangbah ka JyllaA ssam ula pyntip ba ka Sorkar Jylla kan sa shim ïa ki lad jingïada kiba khlaiñ bad ka jingtheh ïa ki kam pynroi ha Tapat ba kynthup ïa ka jingbuh ïa ka battalion camp ba shirta, ka ban ai jingïada ha kane ka thaiñ.
Uwei u briew na Tapat ba kyrteng u Orivel Timung (45) ula iap ha ka jingkulmar kaba la jia hapdeng ki paid Karbi bad ki paid Pnar ka shnong Lapangap dang shen. Kane ka jingjia kala jia haka por ba ki paid nongshong shnong ka Lapangap ki dang leit ot kba sha lyngkha hapdeng ka jingpahara ki Pulit. Hynrei, ka kynhun ki paid Karbi kila wan mih kynsan ban pynthut, kaba lam sha ka jingïashoh bad poi sha ka jingiap briew.
Ka jingkular u Myntri Rangbah ka Assam kala wan kum ka jubab ïa ka dorkhas bala aiti da kiba bun ki seng ki samla pule Karbi. U Myntri Rangbah ula pynbna ïa shibun ki lad jingïada da ka jingthmu ban wanrah pat ïa ka jingsuk bad pynthikna ïa ka bha ka miat jong ki nongshong shnong ha kane ka thaiñ khappud kaba jur ka jingïakynad.
Kum shibynta na ka jingkular, u Himanta ula ong ba ka Sorkar kan sa buh noh ïa ka battalion camp kaba shirta ha ka shnong Tapat/Lapangap ban pynkhlaiñ ïa ki lad jingïada. Ka longïing u Orivel Timung kan ïoh ïa ka song pisa ba T.10 lak bad ka kam sorkar hapoh ka Karbi Anglong Autonomous Council (KAAC).
Nalor ki lad jingïada, u Himanta ula pynbna ruh ïa ki sienjam ban pynkhlaiñ ïa ki lad ai jingsumar, ka pule dangle bad ki jingtei ha ki shnong khappud. Ula kular ruh ba un sa leit hi dalade sha Tapat/Lapangap ha u Naiwieng ban peit thuh ïa ka jinglong jingman ha kane ka shnong.
Haba ñiew ïa ka jingïalang kum kaba sngewtynnad, ki nongïalam ki seng Karbi kila pdiang ia ka jingkular ka Sorkar Jylla Assam ban leh eiei halor ki kam ai jingïada bad ka roi ka par ha ki shnong khappud.
Ka kynhun ba ïakynduh ïa u Himanta ki kynthup ïa ki nongïalam ka Karbi Students’ Association (KSA), Joint Action Committee for Autonomous State (JACAS), Karbi Youth Association (KYA), Karbi Farmers Association (KFA), Karbi Unemployed Youth Association (KUYA), Karbi Students’ & Youth Council (KSYC) bad ka Karbi Anglong Women Justice Forum (KAWJF).