Shillong, Risaw 17 : U Working President jong ka Meghalaya Pradesh Congress Committee Bah PN Syiem ha ka sngi Palei u la ong ba ka jingphet jong ki lai ngut ki MLA ka Congress sha ka NPP kan ym don jingktah satia ïa ka party ha kane ka bye election kaban sa long ha Gambegre ha u bnai ban wan.
Haba kren bad ki lad pathai khubor, u Bah Pynshngaiñ N Syiem u la ïathuh ruh ba naduh mar ïa jop u Saleng kum u MP ba thymmai ka Tura, na ka liang ka party ka la trei borbah ban pynkhreh na bynta ka bye election khnang ba ka Congress kan ïoh bat biang ïa katei ka constituency.
“Ha rilum Garo hi, ka jingmih noh jongki lai ngut ki MLA na ka party kan ym da ktah than haduh katta ha kane ka elekshon shiteng samoi,” u la ong da kaba kubur pat ba lehse lada dei ha rilum Khasi te khlem pep kan don beit ka jingktah,” u la ong.
Kumban shu pynkynmaw, lai ngut ki MLA ka Congress ba kynthup ïa u MLA ka Umsning Dr. Celestine Lyngdoh, nangta u MLA ka Mawhati Bah Charles Marngar bad ruh u MLA ka Nongstoin Bah Gabriel Wahlang ki la leit ban pynïasoh noh sha ka NPP.
Tad haduh mynta hi, ka Congress ka dang sa tang uwei u MLA, kata tang u MLA ka Mylliem, Bah Ronnie V Lyngdoh.
Na ka liang u Bah Pynshngaiñ u la ïathuh ruh ba na ka liang ka party mynta ki la ïaid shaid shaid ka jingpynkhreh na bynta katei ka elekshon shiteng samoi kaba ka party ka la jied ïa u Jingjang M Marak kum u kyrtong.
Haduh mynta ki dang don tang lai ngut ki kyrtong kiba la pyntikna ban aireng ha kane ka elekshon kaban long ha ka 13tarik u Naiwieng, 2024. Kine ki kynthup ïa ka kyrtong ka NPP ba dei ruh ka kurim u Myntri Rangbah ka jylla, ka Dr. Mehtab Chandee Sangma, nangta ka kurim u MLA barim ka Rangsakona, ka Sadhiarani M. Sangma na ka Trinamool Congress.
Lah ban kdew hangne ba ka jingwan jong ka elekshon shiteng samoi kadei na ka jingresaiñ noh u MLA ka thaiñ u Saleng A Sangma hadien ba u la shah jied noh kum u MP jong ka Tura Parliamentary Seat.
