Shillong, Jylliew 26 : U Nongïalam ka NPP ba dei ruh u Symbud Lamphang jong ka Iing Dorbar Thawaiñ ka jylla, u Timothy D Shira u la ong ba ka All India Trinamool Congress kaba don mynta ha ka Liang Pyrshah kumjuh ruh ka Congress kin mad ïa ka jingshah rem kput ha ka elekshon MLA kaban long ha u snem 2023 ha ka jylla.
“Na kaei kaba ngi la ju iohi, ngi lah ban ong ba ka AITC bad ka Congress kin shah rem ha u 2023,” ong u Timothy D Shira, uba dei ruh u MLA ba mynta ka Resubelpara.
Utei u nongmihkhmat u pynkynmaw ruh ba kumno ka National People’s Party ka la mad teng ïa kum kine ki jingjia ha u snem 2013.
“Ngi la kylliang noh sha ka NPP, kaba dei ka party ba thymmai ha Meghalaya ha katei ka por hynrei ngi shah rem bad ngi ioh tang arngut ki MLA, kata na Songsak bad na Dadenggre katba kiwei pat ki shah rem lut,” la pynkynmaw biang u Timothy.
Da kaba pynpaw ïa ka jingkyrmen skhem ba ka NPP kan syllad naphang lin ha ka elekshon ban wan ha u snem ban wan, u Symbud Lamphang u ong ruh ba u khmih lynti ba ka party kan ioh ban khur ym duna ïa ka 17 ngut tang na rilum Garo kaba don 24 tylli ki constituency.
“Ka daw kaba pynlong ba ngin ioh khur bun seat kadei namar ngi don ha ka Liang Synshar bad kawei pat namar ngi la trei shibun na bynta ki paidbah,” u la bynrap biang.
Haba kynthoh pat ïa ka Congress, u la ong ba katei ka party mynta nalor ba kam don shuh ki MLA kadei ruh ka iing ka sem kaba la pait la pra.
Katkum ka jingong jong u, ka dang kham khlain ka Congress lada nujor bad ka Trinamool Congress watla kadei ka party kaba la rim bha hynrei namar ba ka dang shu rung ha Meghalaya kumta kan eh bha ban ioh suhthied.
Halor ka jingkylli, utei u heh ka NPP u ong ba u Myntri Rangbah barim ka Jylla, u Dr. Mukul Sangma u dang tikna ban jop biang lada u ïakhun na Ampati kaba dei ka constituency trai jong u ha shwa ba un resain bad ailad ïa ka khun ba kan rung sha ka saiñpyrthei, kaba kylla long ka MLA kaba mynta jong ka Ampati.
“Lada u (Dr. Mukul) u ïakhun na Songsak un sa shah rem kumta khlem artatien un leit ban phai biang sha Ampati lym kumta un ym lah ban ïarap ïa kiwei lane wat ïa ka kurim jong u kumjuh ïa ka khun,” u la ong.
