Shillong, Nohprah 10: U Nongïalam ka Liang pyrshah u Dr. Mukul Sangma ha ka sngi Thohdieng u la ong ba ka All India Trinamool Congress (AITC) Meghalaya kan sa leh ïa ka ba donkam ban pynshisha ïa ka jingkynnoh ka party ba ka don ka jingpyndonkam bakla ka sorkar haduh T.632 klur
ïa ka Meghalaya Ecotourism Infrastructure Development Project ba pyntrei da ka Meghalayan Age Limited (MAL).
U la ong ruh ba lada ka sorkar ka sngewthuh ba kam don kano kano ka jingbamsap kam dei ban tieng ban sei ïa ki jingshisha ba kam don ka bamsap hynrei namar ka tieng bunsien ka dei ka rukom jong ka ban shu sait khuid khlem da lah ban sei ïa ki jingshisha.
Haba kren sha ki lad pathai khubor, u Dr. Mukul u la ong ba ka sorkar jylla ka don hok ban ujor mukotduma pyrshah ïa u National Spokesperson ka AITC u Saket Gohkale halor ka jingkynnoh bamsap hynrei ha ka juh ka por kadei ruh ban pynshai bad pyni ïa ki sakhi sabut lada kam don kano ka ka jingbamsap.
“Ka sorkar ka don ïa ka kamram ban pynshisha halor ka jingshah kynnoh bamsap bad na ka liang ka AITC ruh kan sa leh ïa ka ba donkam ban ïoh ïa ki sakhi sabut halor kane ka jingkynnoh bamsap ïa ka sorkar jylla” u la ong.
U Dr. Mukul u la ong buh jingkylli ruh ïa ka sorkar jylla, la ka kwah ban rieh ha kum kine ki jingshah kynnoh bad lada ka kwah ban pynshisha kadei ban pynbit pynbiang ïa ki sakhi kumno la pyndonkam ïa ka song pisa ba la mang na ka bynta ki kam pynroi ne ki projek.
