Kob ka BJP ban pyllait paidbah shen ïa ka jinglap halor ka jingtih dewïong ha ka jylla

Shillong, Jylliew 14 : U General Secretary ka BJP Meghalaya, Bah Wankitbok Pohshna ha ka sngi Saitjain u la ong ba ka party shen kan sa pynbna paidbah ïa ka jinglap jong ka halor ka jingkynnoh ba ka don ka jingtih dewiong beain ha ka jylla.
Haba kren bad ki lad pathai khubor, u Pohshna u la ong ba ka Fact Finding Committee ba 10 ngut ka la dep ruh ban phah ïa ka kaiphod sdang jong ka sha ka party la kumba lai taiew ei ei mynshwa.
“Ka dei ka kaiphod kaba la jrong bha. Ngin sa peit bad ngin sa pyntip ïa ki paidbah kaei kaba la lap,” u la ong.
U Pohshna u la ong ruh ba ka party ka dang ap ïa ki katto katne ki jingshisha kiba hap ban pyntikna da ka committee.
“Ki don ki katto katne ki bynta kiba dang sahteng. Na ka liang u Convener jong ka committee u la kyntu ba um pat dei ban pyllait shabar katba ym pat lah ban phah pura ïa ki jingshisha baroh. Ngi dang ap mynta ïa u convener ban ai ïa ka jingsngew jong u halor kane,” u la ong.