Shillong, Nohprah 11 : Ki nongïalam ka BJP ki la kob ba yn dang don shuh shuh ki MLA ka NPP ki ban wan pynïasoh sha ka BJP shwa ka election Assembly 2023. Katba ki nongïalam ka NPP pat ki la ong lait na ka Ferlin Sangma, u Benedic Marak bad sa uwei pat u ban sa pynïasoh u S.G Estamur Mominin yn ym don shuh kiwei ki ban dang leit pynïasoh ne phet na ka NPP.
“ Kine ki lai ngut ruh ki dei kiba la tip lypa ba kin ym ïoh tiket shuh na ka NPP namar ki la don lypa ki kyrtong haka jaka jongki bad u Esmatur ruh ula tip ba un ym ioh tiket shuh namar u la tip ba ka tiket kan leit beit sha u A.T Mondal uba dei u Lamphang ba mynshwa ka ïing dorbar” ong ki nongïalam ka NPP.
“ Ki don ki MLA ka NPP kiba leit ïa kynduh ïa u Himanta Biswa Sarma ha kine ki khyndiat por bad kiba la pynpaw ba ki kwah ban pynïasoh bad ka BJP hynrei na ka liang u Himanta u la phah ba kin ïakynduh ïa u President ka BJP ha Meghalaya u bah Ernest Mawrie” ong ki nongïalam ka BJP.
Shuh la ïoh jingtip ba mynta ka Sngi U Blei u President ka BJP bah Ernest Mawriew, u bah Sanbor Shullai Myntri sorkar bad kiwei kiwei ki nongïalam ka BJP ki la leit ïakynduh ïa u Amit Shah ha nongbah Delhi ban ïakren halor kiba bun ki mat kynthup ruh halor ka jingjia ha Mukroh.
