Shillong, Nailur, 22: U National Spokesperson jong ka All India Trinamool Congress u Saket Gokhale ha ka sngi Palei u la kob ïatai nia bad u Symbud Myntri Rangbah ka Jylla u Bah Prestone Tynsong hakhmat ki lad pathai khubor halor ka jingdkoh ka synshar ka khadar hapoh ka jingsynshar jong ka Sorkar Meghalaya Democratic Alliance (MDA) ba la ïalam da ka National Peoples Party (NPP).
Ha ka sngi Balang u Gokhale u la phah da ka jingthoh sha u Myntri ka tnat PWD (Buildings) u Bah Dasakhiatbha Lamare ban pan jingpynshai halor ka jingïasylla jong ka Sor kar MDA bad ki Kontraktor ban tei ïa ka Iingdorbar Thawaiñ ba thymmai ha Mawdiangdiang.
Katkum ka jubab RTI ba la ïoh pdiang, ka Uttar Pradesh Rajakiya Nirman Nigam, kaba la ïoh Kontrak ban shna ïa ka Iingdorbar Thawaiñ ba thymmai ka la ai wai pateng ïa ka jingtrei sha ki Kontraktor ba la shah kyntait ïa kiba la tip kyrteng kum ka Badri Rai & Company bad ka Shiva Enterprise.
Halor kane ka jingkynnoh, u Bah Prestone um shym la lah satia ban ai jingpynshai bad ban pynksan ba balei ka Uttar Pradesh Rajakiya Nirman Nigam ka la aiwai pateng ïa ka kam sha ki Kontraktor ba la shah kyntait.
Dang shen u Gokhale u la phah ïa ka jingthoh sha ka Sorkar Jylla halor ka jingdkoh treikam jong ka Sorkar ha kaba pyntrei ïa ka Shillong Smart City, ka jingthied jong ka tnat Pulit ïa ki kai bad ka jingjulor jong ki surok ha kylleng ka jylla.
