Shillong, Nailar, 25: Ka Hynñiewtrep Youths Council (HYC) ka kob ban ïatai nia bad u Myntri Rangbah ka Jylla u Conrad Kongkal Sangma lane ïa ki Myntri Sorkar bad ïa ki MLA halor ka jingïasoi jong ka Sorkar Jylla ïa ka Memorandum of Understanding (MoU) ban ïa pynbeit ïa u pud u sam hapdeng ka jylla Meghalaya bad ka Jylla Assam.
Kane ka jingkob ïatai nia jong ka Seng ka long hadien ba ka HYC ka la pynlong ïa ka jingïalang ban pyrshah ïa ka MoU ha sor Nongstoiñ ki la don ki kynhun seng saiñhima bad ki nongbud jong ki seng saiñpyrthei kiba la kynnoh ba ka HYC ka la pyrshang ban ïalam bakla ïa ki paidbah halor ka MoU ïa pynbeit pud ha pdeng ka Sorkar Meghalaya bad ka Sorkar Assam.
“Kine ki seng saiñpyrthei bad ki nongkyrshan ki la kren shane shatai ba kata ka Memorandum of Understanding (MoU) ka long kaba dei bad kaba bha shaba palat bad ki la kob ruh ba dei tang ka party jong ki kaba nud ban ïa pynbeit ïa u pud bad ka Assam,” la ong u General Secretary ka Seng u Bah Roy Kupar Synrem ha u kyrwoh ba la phah sha ki lad pathai khubor.
“Ka HYC ka kwah ban kren shai ba kam shym la ïalam bakla ïa ki paidbah lane kam shym la pynthud ïa ka jingthmu jong ka Sorkar Meghalaya ban ïa pynbeit ïa u pud u sam bad ka Assam. Ka HYC ka kwah ban ong ba ngim don hok ban ïalam bakla ïa ki paidbah bad ha kajuh ka por ki Myntri Sorkar lane ki MLA ruh kim donhok ban pynksan jubor ïa ka bym dei. Khnang ba kan long kaba shai bad ka bym don jingnoh shiliang ka Seng ka kloi ban ïatai haba shit haba shai ka sngi halor kane ka MoU,” ong u kyrwoh.
“Ka HYC ka dei ka seng kaba burom ïa ki paidbah bad ïa ka sur jong u paidbah, te kan pynlong da ka jingïakop pynshai paidbah lane ka jingïatai nia paidbah halor ka MoU ïa pynbeit pud hapdeng ka Meghalaya bad ka Assam. Ka Seng kan sa buh ïa ki nongkren ban kren pyrshah ïa ka MoU bad ngi kyntu ïa u Myntri Rangbah, ki Myntri Sorkar bad ïa kito kiba soi ne kyrshan ïa ka MoU ba kin wan ban pynshai lane pynksan ïa ka MoU kaba ki ladep soi. Ka Seng ka kwah ban kren shai ba ngim kwah ban ïatai nia bad ki briew ki bym don bynta ha ka jingsoi ïa ka MoU lane ki bym don bynta ha ka jingïakren pynbeit pud bad ka Assam. Kumta, ngin pdiang tang ïa u Myntri Rangbah lane ki Myntri Sorkar lane ïa ki MLA ba kin wan mihkhmat ban kyrshan ïa ka MoU lada don. Yn buh mar lai ngut ki nongkren kata lai ngut kiban kren kyrshan ïa ka MoU bad lai ngut kiban pyrshah bad yn ai por mar 15 minute uwei u nongkren,” la ong shuh shuh ka Seng.
Ka Seng ka la pyntip ba ïa ka jingïatai nia kaba nyngkong halor ka MoU yn sa pynlong ha Patharkhmah, Ribhoi District ha ka 30 tarik mynta u bnai ha ka por 12:00 baje mynsngi bad yn sa buh sngi ruh ha Shillong bad ha kiwei kiwei ki jaka kum ha Rambrai, ha Riangdo bad ha kiwei ki jaka.
“Lada jia ba na ka liang jong u Myntri Rangbah lane ki Myntri Sorkar ne ki MLA kiba soi lane rai ban soi ïa ka MoU kim wan ban ïa shim bynta, ka Seng kan pynlong la ka jong ka prokram ban pynshai paidbah bad pyrshah ïa ka MoU kaba long pyrshah ïa ki Hima Khasi,” ong u kyrwoh.
