Ko Symbud Myntri Rangbah sangeh noh shwa ban pynkynriah ïa ki ophisar na SWKH : FKJGP

Mawkyrwat, Nohprah 14 : Ka Federation of Khasi Jaiñtia & Garo People (FKJGP) jong ka South West Khasi Hills District hadien ba ka ïohi jingtip ba ka sorkar ka thmu ban phah ne transfer noh ïa u ophis jong ka tnad PWD (Roads) jong ka Mawkyrwat Division uba bat ïa ka kam kum u Executive Engineer bad ïa u Superintendent jong ki Pulit ka South West Khasi Hills District, ha kaba wat la kine ki ophisar kin dang tang khyndiat bnai kham tam.
Lah ban kdew ba ka jingtrei kam jong u Superintendent jong ki Pulit ka South West Khasi Hills District ka dang dei tang 7 bnai 8 bnai ei ei, kumta kan long kaei ka jingduh ba khraw namar ha kine ki kyndiat bnai la ïohi ïa ka jingtrei shitom jong u kumno ban rat dyngkhong ïa ka jingsniew hapoh distrik ka jong ngi, bad u long uba ïa treilang bad ki paidbah, ki Seng Longkmie, ki Samla Shnong kumno ban wanrah ïa ka shongsuk shongsaiñ khantam ha poh Area Mawkyrwat baroh kawei.
Ym tangkata, kumba long mynta naduh ba wan une u bah B. Jyrwa, MPS kum u Superintendent jong ki Pulit hapoh ka South West Khasi Hills District ka la pynsuk shisha ïa ki paidbah ban ïa treilang ha ki bynta bapher bapher khamtam kumno ban rat dyngkhong ïa ki jingsniew kum u drugs bad ki nongdie kyiad beaiñ hapoh ka South West Khasi Hills District baroh kawei.
Kum ki nongïalam jong ka FKJGP, la ong ba ban shu pynkynmaw ka Dorbar Shnong Mawkyrwat bad ki Seng Longkmie, ki Seng Samla Shnong dang ha kine ki kyndiat sngi ba la ïohi ka jingïoh kem ka jing ki ïa ki kyiad kiba la palat da ki spah tylli ki bailor ha kaba kane ka long ha ka jingïatreilang bad ka ophis jong u Superintendent jong ki Pulit, bad kumta ka FKJGP ka kyntu mardor ïa ka sorkar lyngba u Symbud Myntri Rangbah ka Jylla, Meghalaya, u bah Prestone Tyngsong uba bat ïa ka tnad Home Department ba un sangeh noh ban pynkynriah ïa ka kine ki ophisar, namar kumba tip ka seng ka sorkar ka thmu ban pynkynriah noh ïa u Superintendent jong ki Pulit da ka jingmut ban wanrah ïa u Superintendent jong ki Pulit ba thynmai u bym dei khasi.
‘”Da kane ka jingthmu, kan wanrah jingeh shibun ïa u paidbah jong ka South West Khasi Hills District khamtam ha ka ktien ka thylliej kim lah ban ïa sngewthuh, namar kane kan wanrah ïa ka jingïasngew bad pynjngai ïa u paidbah bad ka Police Department, bad ka seng ka ju ïohsngew na ka por sha por ba ka Home Department ka ju ong ïa ki paitbah jong ka jylla ban wan sha khmat ban ïatrei lang na ka bynta banrat dyngkhong ïa ka jingsniew”, ong ka kyrwoh na ka sengFKJGP.
Namarkata, lada kwah ba ki paidbah jong ka South West Khasi Hills District kin dang ai ïa ka kti kamon ka kti ka diang ban ïatreilang ka sorkar kam dei ban pynkyriah noh ïa u SP ba mynta bad wanrah ïa uwei u SP bym dei khasi.
Ha kajuh ka por, ka seng ka kyntu ïa ka sorkar lada ki don shisha ka jingangnud ïa ka shongsuk shongsaiñ jong u paidbah ka distrik dei ban sangeh noh ban jingpynkynriah kam ïa une u SP uba la trei shitom shisha na ka bynta ka South West Khasi Hills District ban wanrah ïa ka jingbha jingmiat lyngba ka jingïatreilang namar naduh ba don ma u ki khynnah dih druk ki la duna shisha bad kane ka pyni ïa ka jingdon ka jingkitkhlieh ïa ka South West Khasi Hills District jong ngi, namarkata, lada ka sorkar kam sngap ïa ka dawa jong u paidbah ka FKJGP South West Khasi Hills District bad kiwei ki sengbhalang kiba don ha distrik kim banse ban mih madan ha ka jingïatrei lang bad ki riew rangbah ki rangbah shnong bad ki paidbah nongshnong shnong jong ka South West Khasi Hills District.
Kane ka long ka kyrwoh khubor na u General Secretary ka FKJGP South West Khasi Hills District, u bah Balse Kharbani.