Nongpoh, Nailur 19: Ka seng Federation of Khasi Jaiñtia and Garo People ka phah da ka kyrwoh kaba shai sha ka sorkar ba kam dei ban phohsniew ïaka lynti rel katba ym pat lah ban pyntreikam ïaka ILP haka jylla, haka jingïalang pynskhem ïaki nongkitkam ba thymmai jong ka FKJGP Nongpoh Circle kaba la long haka sngi Saitjaiñ ha ïing Dorbar ha Nongpoh.
Ki nongïalam ka FKJGP naduh u Bah Dundee C Khongsit President ka sengkmie, u Samla Kitboklang Nongphlang Vice President kila kren shai ba ka lynti rel kam dei ban wan haka jylla bad ka sorkar kmie kam dei ban pynbor ïaka sorkar jylla ban shna bad wanrah lynti rel katba ka ILP ne ki aiñ ïada mynder kim pat treikam haka jylla.
Kitei ki nongïalam haba kren ha katei ka sngi ka jingpynskhem ïaki nongïalam ba thymmai ka Nongpoh Circle kila pynpaw ka jingsngewkmen ban iohi ba ka mynsiem ieid jaitbynriew ka dang rhem haki samla kiba don ka jingkitkhlieh ban tei ïaka imlang ka sahlang, ka roi ka par bad ka synshar khaddar, da kaba kyntu ruh ïaki nongïalam ba thymmai ba ki dei ban long ki nuksa ba bha sha ki khun samla, watla ki don shibun ki jingeh ban dieng pynkiang haba shimti ïaka kam nongïalam.
Ha katei ka sngi la ioh ruh ban pynskhem haduh 27 ngut ki dkhot bad ki nongïalam jong ka Nongpoh Circle ba kynthup naduh u Bah Ricky Majaw kum u President, u Babitnam Pamshong Vice President, Precious Khymdeit General Secretary, George W Lyngdoh Asst Secretary bad kiwei kiwei bala pynskhem pura da u Bah Dundee C Khongsit President ka Sengkmie haka jingdonlang u Vice- President ka FKJGP Seng Kmie u bah Kitboklang Nongphlang, President jong FKJGP NKHD u Luistar Lyngdoh, Bah Lumlang Mawnai Senior Vice-President FKJGP NKHD, Shanlang Diengdoh General Secretary FKJGP NKHD, Noah Khongstid Asst. Secretary FKJGP NKHD bad kiwei kiwei ki dkhot.
