Nongpoh, Ïaiong 03: Namar ka jingjot rathai jong u surok naduh Bhoirymbong haduh Khyndewso ha Ri Bhoi ka ba la buh jingeh ïaki paidbah haka leit ka wan khamtam ka kit ka bah, ka pang ka shitom bad ki khynnah kiba beh skul man la sngi, ki longkmie longkpa jong ka shnong Umraling ryngkat bad ka seng HNYF Womens Wing bad kiwei kiwei ki shnong ba marjan ryngkat ki khynnah skul naki skul bapher bapher ha katei ka thaiñ haka sngi Saitjaiñ kila mih paidbah ban dawa naka sorkar ba ka dei ban siang surok rong noh ban pynsuk ïaki paidbah haka leit ka wan.
“Ko sorkar sngewbha ai surok ïangi” pyrta ki khynnah skul bad ki longkmie na katei ka shnong kiba la mih paidbah ruh da ka jingsngewkhia ban rah ïaki placard, namar ka jingeh ba ki ïakynduh mynta la bun snem, ha kaba naka liang ki longkmie kiba dei ruh ki dkhot ka HNYF Womens Wing jong ka Umraling Unit kila maramot ruh ïa u surok da kaba tap khyndew haki jaka ba kham sniew eh ha katei ka thaiñ.
Na ka liang ki nongïalam jong ka HNYF Womens wing hapoh ka jingïalam jong ka kong Bety Jyrwa kum ka President kila hiar ruh sha katei ka shnong naka bynta ban kyrshan bad ai mynsiem ïaka jingdawa kaba kongsan jong ki kumba u surok u dei u budlum jong ka roi ka par bad ka jingshah iehnoh beiñ ki paidbah ha katei ka thaiñ mynta la bun snem.
Wat ki khynnah skul bad ki nonghikai kila mih lang ha katei ka sngi ban dawa naka sorkar ba ki la donkam kyrkieh eh ïa u surok ha katei ka thaiñ bad kyrpad ruh sha ka sorkar bad khamtam u MLA ba u dei ban shimkhia ban pynioh surok sha katei ka thaiñ.
U Bah Dominic Lamare Rangbah Shnong ka Khyndewso bad ki longkmie na katei ka shnong kila pynpaw ka jingsngewkhia kaba jur ba haduh mynta ki shem jingeh haka leit ka wan nalor ka jingmad jingeh ha kaba ïadei bad ka bai kali ban leit ban wan namar ki nongñiah kila shim tam ïaka dor namar ka jingjot rathai jong u surok.
Kila ong ruh ba ki khynnah pule kiba beh skul shaduh Bhoirymbong bad kiwei kiwei ki jaka ki shem jingeh shisha ba kim ju lah ban poi haka por kaba biang namar ka jingjot u surok bad jngai ka lynti, bad bunsien kiba pang ba shitom ki kynduh mawsiang shisha ban poi sha ki jaka sumar bad kane ka lah ban wanrah ïaka jingjia ba sngewsih ha kano kano ka por nalor ka jingeh ban kit ïaki mar ki mata ban pynpoi sha ki iew ki hat.
“Kan long ka jingkyrkhu ïa ki bun tylli ki shnong lada ka sorkar ka siang rong ïa utei u surok bad lehse kan kyntiew ruh ïaka roi ka par jong ki paidbah ban pynsuk haka leit ka wan” kila bynrap
Naka liang ka kong Bety Jyrwa kum ka nongïalam jong ka HNYF Womens Wing kala pynpaw ka jingsngewkhia kaba jur halor ka jingeh ba ki paidbah ha katei ka thaiñ ki mad jingeh haka leit ka wan kumba la sakhi ruh ha katei ka sngi ba ka surok ka long kaba khohruh khohram bad shem jingeh bad naka liang ka seng ka kyrpad bad dawa naka sorkar ba ka dei ban shimkhia ban siang mardor ïa utei u surok naka bynta ka jingmyntoi jong ki bun tylli ki shnong ha katei ka thaiñ.
