Ko Conrad Sangma, hato kham kor ka Khalai ban ïa ka jingngeit bad ka Akor?: HYC

Shillong, Jymmang, 06: Ka Seng ka la pynrem jur ïa ka Sorkar Jylla kaba lah wanrah ïa ka Aiñ ban nym kheiñ be-aiñ shuh ïa ki kam khalai ha ka Jylla lyngba ka Meghalaya Regulation of Gaming Act, 2021 bad kumjuh ruh ka Rules, 2021.
“Lyngba kane ka Aiñ, ka Sorkar Jylla ka lah plie war ïa ka lynti ban pynlong ïa ka Jylla ka jong ngi kum kata ka Jylla ha kaba ki briew kin tip noh kum ka “Gambling State” ne “Jylla ïa khalai,” ong u kyrwoh ba la phah da u General Secretary ka HYC CEC, u Bah Roy Kupar Synrem.
Ka Seng ka pynpaw ïa ka jingkyrshan ïa ki kynhun Balang bad kumjuh ruh ïa ka kynhun ki Niam bapher bapher kum ka KJCLF bad ka SAFF kiba lah mih shakhmat ban pynpaw ïa ka jingpyrshah bad ban dawa ba dei ban pynduh pyndam noh ïa katei ka Aiñ.
“Ym tang ba ka khalai lane kita ki Casino ki long pyrshah ïa ka niam ka rukom jong ngi hynrei khamtam ka long pyrshah ïa ka burom ka ijot longbriew manbriew (morality), kaba kum ka Jylla bad ka jaidbynriew ngi kheiñkor haduh katta Katta. Ngi pynpaw ruh ba kane ka Sorkar imat kam pyrkhat bha ba ka Khalai ka lah ruh ban wanrah sa kiwei ki jingsniew ha ka imlang sahlang, kum ka jingdih buaid naduh ki droks, ki kam awria bad kiwei kiwei ki jingsniew ha kitei ki jaka khalai,” ong u kyrwoh na ka HYC.
“Ngi pyrshah ïa ka jingkren u Myntri Rangbah ka Jylla u Conrad Sangma ban pynpaw ba ka Sorkar kam pat pyntreikam ïa katei ka Aiñ haduh mynta bad ba kin dang ïakren bad ïathir sani bha ha shuwa ban shim Rai. Kane ka long kaei kaei ka bym lah ngeit namar lada ka long kumta, ka Sorkar Jylla ka ladei ban ïamir jingmut ha shuwa ban wanrah ïa ka Aiñ hapoh Ingdorbar Thawaiñ bad ruh kam pat dei ban shna ïa ki Rules. Hynrei kumba ka long mynta ka Aiñ ladep shna bad kaba sah ka long tang ban jied ïa ki jaka ban buh ïa ki Casinos bad ban ïoh ïa ki kompeni ki ban pynïaid ïa ki jingïalehkai bapher bapher. Dei tad ba lah mih ka jingpyrshah ba u Conrad Sangma u sa pynpaw ïa kitei ki kyntien bad kiba dei tang ki kyntien ban da rapjot ïa ka jingleh bakla jong ki,” la kynthoh ka Seng.
“Ka Seng ka dawa, ba lada Sorkar ka kwah ban pynheh ïa ka jinglum khajna ka jong ka khnang ba kan lah ban leh ïa ki kam pynroi ha ka Jylla, ka dei ban shim da kiwei ki lad ki lynti ym da kaba pynlong ïa ka Jylla ka jong ngi kum ka jaka Khalai. Ngi dawa ba dei ban pynduna ka jingleh lut phut ban pynlut ha ki tamsa kiba bapher bapher ki bym phoida ei ei ïa ka Jylla, ban nym siew shuh kano kano ka jingsiew ïa ki MLA/MDC, Ex MLA/MDC/MP kiba bat kum ki Chairman, Co Chairman, Vice Chairman bad kiwei kiwei ha ki Boards, Corporation, namarba kine baroh ki ïoh ïa ka tulop bad pension ka jong ki,” la ong ka Seng.
“Dei ruh ban wanrah ïa ka rukom treikam ka bym ailad ïa ka bamsap bampong ha ka Jylla (zero tolerance policy on corruption). Dei ban tehlakam ba ka khajna ba ka Sorkar ka dei ban ïoh kan ym syrwa kai (leakage of Revenue) bad ruh ban tehlakam ïa ki kam Benami kiba ailad ïa ki bym dei ki Riewlum ban trei ban ktah khlem da siew khajna sha ka Sorkar,” la ai jingmut ka HYC.
“Ngi dawa ba ka Sorkar ka dei ban pynduh pyndam (Repeal) ïa kane ka Aiñ bad ka Rules ha kaba ïadei bad ka Khalai bad ba kan thaw da kiwei pat ki lad ki lynti ban ïoh lum khajna na bynta ka Jylla,” pynkut u kyrwoh.