Nongstoiñ, Jylliew, 20: Ka All India Trinamool Congress Nongstoiñ Constituency, ka la nang suh thied ha man la ki jaka bad ki shnong. Ka jingsdang ban suh thied jong katei ka seng saiñ pyrthei hapoh Nongstoiñ Constituency, ka pyni ba ki paitbah ki don ka jingshaniah imat ïa ki nongïalam, watla kim pat dei satia kiba la long teng ki nongmihkhmat kum ki MDC lane MLA hynrei ki dang long tang ki nongtrei jong kiwei pat ki seng saiñ pyrthei.
Katei ka party ka la ïoh ban thaw khatlai tylli ki Primary Unit ha kaba khatar tylli ki dei kiba la dep pynskhem bad kawei ka dei ka Mawsynrang Primary Unit, kawei na ki kyntoit jong ka shnong Sangriang, ha kaba u bah Macmillan Kharbani President ka AITC Nongstoiñ Constituency ryngkat ki nongkitkam jong ka Youth Wing, ha ka janmiet sngi saitjaiñ ka 18 tarik Jylliew, ki la leit ban pynskhem ïa ki nongkitkam bad ki dkhot jong katei ka Primary Unit.
Lah ban kdew hangne ba ka shnong Sangriang ka dei kawei na ki polling station kaba heh bha ha ka thaiñ Nongkhnum bad ha u 2018 u kyrtong ka NPP, u la ïoh ïa ka jingkyrshan kaba pura na ki paitbah katei ka than. Hynrei ha kane ka election ka ban sa long ha u snem ban wan kata ha u 2023, lada ki nongkit kam jong ka AITC kin trei shitom kan shem jingeh ïa u MLA ba mynta.
