Kmen uba pan RTI bad u Muktiar ba kular u DC-EJH ban pyntreikam ïa ki mat jingdawa

Khliehriat, Naiwieng, 28: U Bah Reachingson Siangshai uba dei u nongpan RTI bad u muktiar u Bah Kerlang Ksoo ki la pynpaw ka jingsngew kmen ba u Deputy Commissioner ka East Jaiñtia Hills District u la kular ban pyntreikam ïa ki mat jingdawa ban pynjanai ïa ka jingtreikam jong ka District Selection Committee (DSC) ha ka thungkam thungjam.
Kum ban shu pynkynmaw, ha ryngkat ka jingïadon lang ki ar ngut ki MLA ba kynthup u MLA ka Khliehriat Constitunecy u Bah Kyrmen Shylla bad ka MLA jong ka Sutnga-Saipung Constituency ka Kong Santa Mary Shylla, u Deputy Commissioner ka East Jaiñtia Hills Shivansh Awasthi u la mynjur ban pyntreikam ïa ki 17 tylli ki mat jingdawa ban pynbha ïa ka thungkam thungjam jong ka DSC ha East Jaiñtia Hills District
Ki katto katne tylli ki mat jingdawa kiba u Deputy Commissioner u la pynpaw ba um lah ban shim rai hynrei un hap ban pan jingmut na ka Personel Department ka Sorkar Jylla.
U Bah Siangshai bad u Bah Ksoo ki la kyntu ïa u Deputy Commissioner ba ym kut tang ha ka jingkular khlem da pyntreikam ïa ki mat jingdawa.
“Lada ki kheiñ sting na ka liang jong ngin, ngin sa wad sa da kiwei ki lad ki lynti ban ïaid da kawei pat ka sienjam,” ki la ong.
U Bah Ksoo u la kyntu ïa u PIO ban un long uba smat bad uba kloi ban jubab ïa kino kino ki jingkylli ba la pan lyngba ka RTI haba don kiba wad jingtip na ka Office u Deputy Commissioner.
U la kyntu ïa u Deputy Commissioner ban un pyntreikam hok ïa ki kyndon jong ka RTI Act.
Kum ban shu pynkynmaw u Reachingson Siangshai na East Jaiñtia Hills District u la pan lai tylli ki RTI ha kaba ïadei bad ka jingbym ïaid beit ka rukom thungkam thungjam ha lyngba ka DSC ha East Jaiñtia Hills District bad u la kynnoh ba ka DSC ka la pynkheiñ ïa kiba bun ki aiñ ki kyndon ba la buh da ka Sorkar kaba la wan lyngba ka Personel and Administrative Reforms Department.