Shillong, Jylliew, 28: U Myntri Sorkar Pdeng uba khmih ïa ka tnad Kam Pohiing bad tnat Cooperation, u Amit Shah u la pynpaw ïa ka jingsngewkmen haba la pynbna ba yn pynlong ïa ka 2029 World Police and Fire Games ha India, bad u la ong ba kane ka dei ka burom ïa baroh ki nongshong shnong jong ka ri.
Ha ka post ha ka rynsan X u Myntri Sorkar Pdeng ba dei khmih ïa ki tnad Kam Pohiing bad Cooperation u la ong “Kane ka dei ka burom jong baroh ki nongshong shnong, ba la jied ïa ka Bharat ban pynlong ïa ka 2029 World Police and Fire Games. Ka jingjop ka Bharat ïa ki jingtyrwa ban pynlong ïa kane ka lympung ka dei ka jingithuh na ka pyrthei ïa ki jingdon jingem jong ngi kiba ïadei bad ki kam ïalehkai ba la tei hapoh ka jingïalam jong u Myntri Rangbah Duh Narendra Modi. La jied ïa ka Ahmedabad ban pynlong ïa kane ka lympung kaba wanrah lang ïa ki pulit, ki nongpynlip ding bad ki nongai jingshakri ha ki kam ba sngewsih ba kin ïakhun ha palat 50 jait ki jingïalehkai bad kane ka dei ka dak jong ka jingkiew kyrdan kane ka nongbah kum ka jaka na ka bynta ki kam ïalehkai.”
Ïa kane ka World Police & Fire Games la pynlong shisien man ka ar snem naduh u snem 1985. Haduh mynta la pynlong 20 tylli ki bynta jong kane ka lympung ïalehkai naduh ba la sdang ïa kane ka lympung (USA-8 sien, Canada-5 sien, Europe-4 sien, UK-2 sien bad China-shisien). Kine ki jingïalehkai ki long na ka bynta ki briew kiba dang shakri bad kiba la shongthait na ki kam Pulit / Kynhun Pynlip ding / Medical / Emergency / Disaster bad ki First responder, bad kiwei kiwei. Ka kynhun na India ka la ïashim bynta nyngkong eh ha kine ki jingïalehkai ha ka Adelaide World Police and Fire Games ha u snem 2007. Ïa ka World Police & Fire Games kaba khatduh (ka sien kaba 20) la pynlong ha Winnipeg, Canada naduh ka 26 tarik u Naitung haduh ka 6 tarik u Nailar 2023, ha kaba 133 ngut ki nongïalehkai jong ki pulit India ki la jop 343 tylli ki takma kaba long ka rekod (Ksiar -224, Rupa -82, Rynnong-37).
Naduh ba ka la ïashim bynta ha u snem 2007, ka kynhun pulit ka India ka la ïoh ban khur palat 1400 tylli ki takma ha ki 8 tylli ki jingïalehkai. Ïa ka kynhun shipai jong ka ri India ban ïashim bynta ha ka World Police & Fire Games la jied katkum ka rukom lehkai jong ki ha ka All India Police Games kaba ju long man la u snem. Ka All India Police Sports Control Board, ka bor synshar ban pynlong ïa ki jingïalehkai jong ki pulit ha ka ri kaba don haduh 53 tylli ki seng dkhot naduh ki Central Armed Police Force (CAPF), ki tnad pulit jong ka jylla bad kiwei kiwei ki tnad pahara, ka ju pynlong 40 tylli ki lympung ïalehkai jong ki pulit man la u snem. Ki nongjop takma ksiar ha ki jingïalehkai bapher bapher ha ka All India Police Games ha u snem ki shah jied sha ka kynhun ka ban mihkhmat ïa ka India ha ka World Police & Fire Games.
