Nongpoh, Nailar 21: Ki paidbah nongshong shnong jong ka shnong Nongthymmai Makdoh ki la pynpaw ka jingsngewkmen hadien 33 snem ka jingïaid lynti jong ka shnong ka dang dei ka sien ba nyngkong ban leit jngoh bad iuhkjat da u MLA hadien ba u MLA ka Mawhati, u Bah Charles Marngar, u la leit ban jngoh ïa katei ka shnong ha ka 19 tarik Nailar.
Ha katei ka sngi la pynlong ruh ïa ka jingïalang paidbah ha ïing Dobrar Shnong, ha kaba u Bah Charles Marngar u la ïakren bad ïathir bad pyrkhat sani halor ki jingduna kiba ka shnong ka donkam kum ka bording ilektrik, ka umbam umdih bad ruh ka jingeh ha ki lynti syngkien.
Ha katei ka jingleit iuh kjat u MLA u la noh synñiang da ki Solar Light, kawei sha ka Balang Katholik bad kawei sha ka Balang Presbyterian. Nalor kata, u la pynbna ruh ïa ka jingthmu ban pynïoh ïa ka surok lyngba ka Border Scheme, na ka Umsiang-Amdubighat ban pynïasoh sha Nongthymmai Makdoh kaba jngai kumba 5 km. La khmih lynti ba kane ka surok kan sa ïoh siang rong ha ki snem ban wan.
Ka jingwan poi jong u Bah Charles Marngar ha katei ka shnong kaba don ha khappud Assam ka la pynhun mynsiem ïa ki paidbah nongshong shnong. U Rangbah Shnong u Bah L. Kasar lem bad ki paidbah kiba la poi sha ka jingïalang, kynthup ruh ïa ki longkmie, ki la pynpaw ka jingsngewnguh bad ka jingkmen kaba khraw namar ba hadien bun snem la sdang ban plie lad ïa ki kam pynroi kiba ki la angnud la slem ha katei ka thaiñ.
