Kynshi, Jylliew 20: Ki paidbah nongshongshnong jong ka Kynshi Diwah Lawkariang mynta ka sngi, ki la dap da ka jingkmen kaba khraw hadien ba ki la ïoh la u jong u Sordar ba pura u Samla Ronald Stone Marweiñ.
U Samla Ronald u la jop ha ka jingïajied Sordar ba la pynlong da ka Hima Nongkhlaw, ba la pynïaid da u Syiem Khynnah bad ki Myntri.
Ha kane ka sngi la jied ruh ïa u Secretary ka Shnong, u Samla Comforward Nongsiej bad Assistant Secretary ïa u Bah Colonoly Syiemlieh.
Lah ban kdew hangne ba ka Shnong Kynshi Mawria Lawkariang, kadei ka shnong ba ka dang shu thymmai ba u snem 2020, kaba dei ka Shnong ba la pynkha na ka Shnong Kynshi Mawria bad Mawlangren.
Hadien ka jingïajied ki paidbah shynrang bad kynthei ki la leit ai khublei ïa u Samla Ronald bad Samla Comforward bad ki la pynspong ruh ïa u Samla Ronald bad u Chairman jong ka Committee ba peit shipor ïa ka Shnong, u Bah Bredist Lyngdoh Nonglait u la ai ka jingkyrkhu kyrdoh.
Kumjuh ruh na ka liang u Sordar Kynshi Mawria bad u Sordar Mawlangren, ruh ki la leit ai khublei kyrpang ïa u Sordar Ronald Marweiñ.
U Samla Ronald, u la pynpaw ka jingsngewkmen ba ka Shnong ka la lah ban jied ïa u Sordar hadien kumba shi snem tam ba la ïoh la ka jong ka Shnong. U la khublei ruh ïa ki paidbah kiba la pynkit ha u ïa kane ka kam ban synshar ïa ka Shnong. U la ong ba un ïatreilang bad ki rangbah bad ki paidbah na ka bynta ka roi ka par jong ka Shnong baroh kawei.
