Nongstoiñ, Nailur, 24: Hadien bun tylli ki snem ba ki la mad ïa ka jingeh bad ka kordit khait, namar ka jingsniew palat ki surok ki ban leit sha ki shnong ki thaw kiba don ha ka thaiñ Nongjri, kaba kdup ïa ki phew tylli ki shnong, mynta pat ki paidbah katei ka dong ka thaiñ ki la pynpaw ïa ka jingsngewkmen, hadien ba ka tnad ba dei peit ïa ka kam surok, ka la shna pynbha bad siang rong ïa kitei ki surok, kiba pynïasoh sha ki shnong ki thaw bad kane ka la pynsuk shisha ïa ka ïaid ka ieng bad ka kit ka bah jong ki paidbah nongshong shnong.
Kum ban shu pynkynmaw ba mynshwa eh na ka liang ki sengbhalang lem bad ki nongsynshar shnong katei ka thaiñ, ki la pynlong ruh ïa ka jingïakhih da kaba khang pyrshah ban ïaid kali heh na katei ka surok, namar ka jingsniew shaba palat kaba la pynlong wat ïa u District Magistrate ka West Khasi Hills, ban pynjari syndon da ka kyndon 144 CrPC ban khanglad ïa ki trok bad kali heh ban ïaid lyngba katei ka surok. Ki nongshong shnong ruh ha katei ka por ki la hap ban pyndonkam ruh da ki kulai ban kit jingkit bad kumjuh ban leit iew leit hat.
Hynrei hadien u snem 2018, da ka jingshimkhia u MLA ryngkat bad ka tnad PWD, la ïoh ban shna pynbha ban siang rong noh ïa kitei ki surok, ba kynthup ïa ka surok ba 3 kilometer shiteng (3.5 KM) na Riangsih sha Riangkang, kaba la ïoh lyngba ka scheme RIDF ha ka mang tyngka ba 3 klur shiteng. Na Riangkang sha Umkait 4 kilometer shiteng (4.5 KM) kaba la mang lyngba ka CRF kumba 4 klur shiteng bad na Umkait sha Nongjri-Nongmisei-Nongrathaw, kaba dang ïaid shait shait mynta ban pyntrei lyngba ka scheme PMGSY.
Ha ka jingïakren bad ki nongpathai khubor, na ka liang ki nongïalam shnong katei ka thaiñ, ki la pynpaw ba ha kine ki khyndiat snem ba la lah, ki paidbah ki la mad shisha ïa ka jingeh la ha ka leit ka wan, ka kit ka bah bad khamtam ha ka pang ka shitom namar ka jingsniew palat pud jong ka surok. Hynrei mynta pat ki la suk shibun ha ka leit ka wan ne haba don kino kino ki kam ba kyrkieh ruh ki la lah ban ïabeh.
Ki la ai khublei kyrpang ïa ka tnad PWD bad ïa u nongmihkhmat ka thaiñ u Bah Gigur Myrthong, kiba la pynïoh ïa ki ïa katei ka surok kaba la long ka jingkyrkhu ïa ka dong ka thaiñ. Ki la pynkynmaw ruh ba ki la mad shisha ïa ka jingeh ba khraw ha kine ki snem ba la lah, namar ka jingsniew palat katei ka surok bad mynshwa haba ki leit sha Riangdo, ki sngew artatien hato la kin poi ne em, namar bun sien ki kali ki sahkut tang ha shiteng lynti. Hynrei mynta pat ki la suk shibun namar ka jingshimkhia jong ki bor ba dei peit.
U sordar ka shnong Riangkang u Bah Tarphus Ïawphniaw u la pynpaw ka jingsngewnguh ïa ka sorkar ha ryngkat u MLA, kiba la pynïoh ïa kane ka surok. Katba na ka liang u bah Donwell Rongrin, Organising Secretary jong ka Synjuk ki Nongsynshar shnong ka thaiñ Nongjri bad Langdongdai, u la ong ba namar ka jingsniew palat kane ka surok, mynshuwa ka synjuk ka la hap ban khang syndon ban ïaid kali heh na kane ka surok.
Na ka por sha ka por ka synjuk ka la dawa ban shna noh ïa kane ka surok, hynrei kam shym la don kano kano ka jingshah shkor na ki bor ba halor bad dei tad hadien u snem 2018, ba ka tnad PWD lyngba ka jingshimkhia u MLA ka la mang tyngka ban shna ïa katei ka surok bad mynta la ïoh ïa kane ka surok ka ba bha, kaba la long shisha ka jingmyntoi ïa ki paidbah nongleit nongwan, khamtam ïa ki nongrep ba ki la lah ban pynïaid iew bad pynpoi ïa ki mar rep jong ki sha ki iew ki hat ha kano kano ka por khlem jingeh.
Haba pynpaw ïa ka jingeh kaba ki nongshong shnong ki la mad baroh shikatta, na ka liang u Fr. Stephen Lamin u ba dei u Parish Priest ka Nongjri Parish, u la ïathuh ba mynshwa haba ki leit sha Riangdo na ka bynta ki jingdonkam, ki sngew artatien la kin poi ne em namar ki kali ki sahkut tang ha shiteng lynti. Hynrei mynta pat kim don shuh ka jingkhuslai lada ki donkam ha kano kano ka por ruh, namar ka surok ka la bha bad kane ka la pynsuk ruh ïa ki paidbah nongrep kiba ju im ja ha ka kam rep kam riang.
