Shillong, Nailur : Na ka liang ki nongshong shnong ka Mawkynroh Umshing Block-1 Block-3 ki pynpaw ka jingsngewkmen kaba khraw hadien ba kila ïoh ïa ka lynti surok kaba thymmai kaba la pynsuk shibun ha kaba ïadei bad ka leit ka wan.
U MLA ka thaiñ ula pynpaw ka jingkmen ban ïohi ba kane ka surok kala pynkylla dur ïa kane ka shnong kaba la heh bha namar ha ki snem kiba la dep ka dei ka lynti kaba sniew bad kaba la wanrah shibun ki jingeh ïa ki nongshong shnong kane ka thaiñ.
Hadien ka jingkyrpad na ka liang ki nongshong shnong kumta ruh na ka liang u MLA ula ong ba ula shimkhia halor kane ka bynta tad haduh ba ka sorkar kala mang ïa ka skhim kaba 3 klur tam na ka bynta ban shna ïa kane ka surok. Halor kane u MLA ula pynpaw ruh ka jingsngewnguh ïa ki enjiniar kiba la shimkhialang kham- tam ruh ïa u Symbud Myntri Rangbah ka jylla u Bah Prestone Tynsong bad ula kyntu ruh ïa ki nongshong shnong jong ka Block-1 ba kin ïai shah shipor namar ïa kane ka surok kaba dang sah yn sa sdang noh shen hadien ba ka bneng kala kham rang bad ba kin ïaleh ban pyndep noh hapoh u bnai Lber u ban wan.
Ha kajuh ka por ula ong ruh ba kane ka shnong watla ka dang dei kaba kham thymmai hynrei ka long kaba donbok shibun namar ym tang ba kala ïoh ïa kane ka surok thymmai hynrei kan ïoh ruh ïa ka skhim Jal Jeevan Mission (JJM), kata ban pynpoi um ha man la ki thliew ïing.Nalor kata ula ong ruh ba ula dep ban ïakren na ka bynta ban khmih ha kaba ïadei bad ka jingpynbiang ïa ka bording ilektrik hapoh kane ka shnong nalor kiwei pat ki jingdonkam kiba kham kongsan.
Shuh shuh u Bah Sawkmie ula pynpaw ruh ba ka shnong Mawlai ka dei kaba la heh bha bad kaba shem shitom shibun ban lah ban pynbiang lut ïa ki jingdonkam jong u paidbah, hynrei kum u nongmihkhmat uba don ïa ka jingangnud ban khmih na ka bynta ka bha ka miat bad ka roi ka par jong ka shnong Mawlai un ïai bteng ban trei shitom bad wad ïa baroh ki lad ki lynti ban pynurlong ïa ka jingangnud ka jong ki.
Ha katei ka jingïalang la ïoh ruh ka jingkren na u Secretary Shnong Bah L.Diengdoh, Rangbah Dong bad ki longkmie kiba la pynpaw ka jingsngew nguh ïa u MLA halor ka jingshimkhia ka jong u ban pynurlong ïa kane ka kam kaba kila angnud la kham slem.
Ha kane ka sngi la ïa don lang ruh u Executive Engineer ka Shillong By-pass Division u Bah S.Lytep, u Secretary Shnong Bah L.Diengdoh, Rangbah Dong, ki riew rangbah, ki longkmie bad ki samla jong ka shnong.
