Nongstoiñ, Nailar, 03: Ka ophis Krishi Vigyan Kendra, West Khasi Hills kaba don ha Nongshyllong, Eastern West Khasi Hills ha ka sngi Saitjaiñ ka la rakhe ïa ka jingpyllait u Myntri Rangbahduh ka ri u Narendra Modi ïa ka skhim ba kyrpang na ka bynta ki nongrep kaba la tip kum ka PM Kisan Saman Nidhi ha ka sien kaba ar phew.
Ïa ka jingïalang kaba la long ha ophis ka KVK la pynïaid da u ophisar u Bah B.Sungoh ryngkat ka jingïadon lang jong baroh ki ophisar bad ki nongtrei.
Ha kane ka sngi, palat 170 ki nongrep na West bad Eastern West Khasi Hills ki la poi ban ïashim bynta ha kane ka jingïalang.
Ha ka jingïalang la pyni Live ïa ka jingkren jong u Narendra Modi Myntri na ka jylla Uttar Pradesh kaba la pynlong na ka bynta ka jingpyllait ïa ka skhim na ka bynta ki nongrep ha ka sien kaba 20.
Shuwa ban sdang ïa ka prokram la ai jingpynshai sha ki nongrep kumno ba kin applai ïa ka skhim da kaba pyndonkam da ka e-PMKISAN bad la ïoh ruh ïa ka jingpynshai halor ki jingmyntoi ba ki nongrep ki ïoh lyngba ka skhim.
Ha kajuh ka por la pynkylla Khasi ïa ka jingkren jong u Myntri Rangbahduh ka ri da ka Kong Y. Sohtun.
Kum ban pynkynmaw ba ka Krishi Vigyan Kendra ka dei kawei na ki tnad trei kam jong ka Sorkar Pdeng kaba peit bad khmih ïa ka jingbit jingbiang jong ki nongrep bad kaba ïatrei lang ryngkat ryngkat bad ka ICAR ha kaba bunbah ki nongrep hapoh ka jylla ki la ïoh jingmyntoi ym tang da ka jingïarap pisa hynrei da ki tiar ki tar hadien ba ki la pyndep ïa ka jingleit pyntbit ha ki jaka ai jinghikai shaphang ka rep ka riang.
Na ka liang ki nongrep kiba la wan ha kane ka sngi ki la pynpaw ïa ka jingkmen kaba khraw ïa ka jingpyntrei kam jong ka Sorkar Pdeng ïa ka PMKISAN namarba ka la kyntiew ïa ka ïoh ka kot jong ki nongïohbhah na ka skhim.
