Nongstoiñ, Nailur, 12: U Bah Michael Thongni, General Secretary, HSPDP Nongstoiñ Area Unit ha ka jingïakren u la phah ïa u kyrwoh khubor ban pynpaw ïa ka jingsngewnguh sha baroh ki Nongkyrshan ka Party HSPDP, na ka bynta ki jingdwai ba ki la buh haduh ba ka Party ka la ïoh ban sei ïa u Kyrtong jong ka Nongstoiñ Constituency hapdeng ki jingeh kiba bun.
Ha ka kyrwoh u la ong, “U Bah Sanjied Kynsai Shangrit u dei u khun phrang sngi jong uwei na ki nong ki nongïaleh Hills State ka Jylla Meghalaya. U long u briew u ba kylluid ka mynsiem bad lah ruh ban sngew ban sngap, ban tip ban ïohi ïa ki jingeh jong ki briew kiba donkam ïa ka jingsngap lem”.
“U dei u briew u ba la ju im ha ka jinglongduk ha ryngkat ka jingkit jingbah ban ri ban sumar bad ban pynbit pynbiang ïa ki jingdonkam ïa ka ïing bad ïa la ki para ryngkat u Kpa bad ka Kmie jong u. U dei u païa ba skhem jong ka ïing ka sem bad khlem pep un long ruh u païa na bynta ka ri bad ka jaitbynriew, lada ki paidbah ki ai ïa ka jingieit ha u snem 2023”.
“U la ju trei na bynta u paidbah bad shibun bah ki kam kiba u la leh ha rieh khlem da put turoi. U la ju ïaid bad don ryngkat ki samla ha ki seng bhalang kiba pher ba pher ban trei da ka mon sngewbha, na bynta ka jingbit jingbiang ka jingbha jingmiat na ka bynta ki paidbah”.
“Kumta, lyngba ka lynti ïaid ka jong u ngi tip ba u la dei uta u rangbah u ban ïalam ïa ki paidbah Nongstoiñ Constituency bad ka party, da ka lynti ka jingsngewrit bad aiti lut kumba u nongïalam jong ngi u (L) Maieit Hoping Stone Lyngdoh, u la ju hikai ïa u ha ki por kiba u dang rit mynba u Maieit u dang don ha ka met ka phad kaba khlaiñ”.
“U don ïa ka mynsiem ïaishah bad ieit ïa ka nongrim ba la hikai da ka party, namar ha u snem 2019 u la duh noh ïa ka Ticket MDC. Hynrei u ïai neh bad don ryngkat bad kane ka party ban shakri ïa u paidbah da ka lynti ba u Maieit u hikai. Lada u jop un dei u ta u nongïalam u ban kdup ïa u rit u ria, u duk u suk, u ba duna u ba biang, ki longkmie, rangbah bad ki samla, khlem da noh shilliang ïano ïano ruh kumba la ju leh ka party ha ki snem kiba la leit noh”.
“Nga kyntu sha ki President Secretary ki Primary Unit ba kum u General Secretary ryngkat ki Nongïalam lem bad u Candidate, ba ka party ka im bad ka khlaiñ dei namar ka jingdon jong ki nongkitkam kiba ïaineh ha ka nongrim ki nongrim kiba la buh la bsat ha ka party HSPDP”.
“Kum ki nongïalam kiba skhem, kim dei satia ban shah ïalam bakla tang ha kane ka kynta kaba lyngkot bad klet ïa ki jinglen lade kiba la bun snem ne ka nongrim kaba la hikai da u (L) Maieit ïa kaba ki la ri kyndon da ki phew snem mynta. Kaei kaba donkam mynta ka long ban long tylli kawei ban wanrah biang ïa ka burom jong ka party”, ong ka kyrwoh na u Bah Michael Thongni General Secretary HSPDP Nongstoiñ Area Unit.
