Shillong, Naitung 24 : Ka United Democratic Party (UDP) ka la pynpaw ïa ka jingkmen kaba khraw halor ka jingïaid shakhmat ka jingïakren ïa suk bad ka kynhun kieng atiar Hynniewtrep National Liberation Council (HNLC).
“Ngi dap da ka jingkmen ba ka kam ka la ïaid mynta shakhmat,” ong u General Secretary ka UDP, Dr. Jemino Mawthoh haba kren bad ki lad pathai khubor.
Da kaba kyntu ruh ïa ka HNLC ba kan wan shakhmat na ka bynta ka jingïakren ïa suk, u Mawthoh u la ong, “Ngi kwah ba pdiang ïa ki para jongngi kiba don ha ka HNLC ba kin wan shakhmat ban shim kabu ïa kane ka jingïakren bad ka sorkar bad khnang ba ngin lah ban wanrah biang ïa ka suk ka saiñ ha ka jylla Meghalaya.”
Halor ka jingkylli, utei u heh UDP u la ong ruh ba ka long kaba donkam na ka bynta ka sorkar ba kan shimkhia mardor na ka bynta ki jingeh bad ki jingkhuslai jingmut ba ki samla ki ïa kynduh khnang ban khanglad ïa ka jingeh na ka jingdon ki kam pyntriem ha ka jylla.
“Lada ïa kren ïa ka jingbym ïohkam ïohjam ha ka jylla kadei kaba i ma bad ngi don ruh shibun bha ki samla pule kib alah ban wanrah ka jingmyntoi kiba lah ban trei ha ki liang bapher bapher hynrei lada ym don ka lad bad lada ngim plie lad ïa ki, kumta ka jingkhuslai kan synshar ïa ki bad mih kine ki jingeh baroh,” la bynrap biang u Dr. Jemino.
Shuh shuh u ong ruh ba ka long kaba donkam ban thaw bun ki lad ki lynti na ka bynta ki khun samla bad ruh ban ïalam ïa ki ha ka lynti kaba dei.
Haba kren pat halor ka shongsuk shongshngaiñ, utei u heh ka UDP u ong ruh ba kat nang jur ka jingkhuslai jong ki samla, katta ruh ki kmie ki kpa ki rit mynsiem namar ma ki ruh kim tip shuh kaei ba kin leh na ka bynta ka lawei jong ki khun ki kti.
