Shillong, Naiwieng 12: Na ka liang ka SPARK ka la pynbna ba ha kane ka snem na ka liang ka President bad ka nongseng jong ka Shima Modak ka la shah pynkup burom da ka 4th Govind Bahirvani Memorial Excellence Award 2024. Kane ka jingshah pynkup burom ka la long halor ki kam kiba ka la trei kiba la wanrah ka jingmyntoi ïa ki samla bad kumjuh ruh ïa ki shnong ki thaw.
La ong ba ki kam jong ka ki la ai mynsiem ïa kiba bun balang bad khamtam eh ïa ki riew shimet bad kumjuh ruh ïa ki nongïalam shnong. Ïa kane ka khusnam la ai da ka Menorah Sports & Cultural ha ka prokram 14th Sur Sargam 2024 kaba la long ha Shillong. La ong ba kane ka prokram ym tang ba ka la dei ka jingrakhe ïa ka jingdon jong ki sap bapher bapher, hynrei ka la wanrah ruh ïa ka jingsngew ïatylli bad ka jingdonkam ban kyntiew ïa baroh lang.
Kum ka dak ka jingrakhe ïa kane ka jingïoh khusnam na ka liang ka SPARK ka ai khublei ïa ka samla Modak halor kane bad ai ba kan nangkiew shaphrang ha baroh ki liang jong ka jingim jong ka, ong ka kyrwoh ba la phah da ka kong Irini Marboh Secretary, SPARK.
