Kmen ka Skul St Peter SS Khuswai ba ioh kamra klas thymmai, aiti u MLA da ka Laptop bad Work Order
Nongpoh, Risaw 27: Ka skul St Peter Secondary School, Khuswai kawei naki shlem pule kaba don haka shnong ha khappud ka Meghalaya bad Assam mynta ka sngi da ka jingkmen kala ioh ban plie paidbah ïaka kamra klas ba thymmai ban dang bteng ban ai ka jingshakri sha ki samla pule ha katei ka thaiñ khappud lyngba ki kamra klas kiba biang.
Ïa katei ka kamra klas la tei lyngba ka skhim SRWP haka jinglut kumba 2 lakh ryngkat ki jingïarap naka Parish ban pyndep ïaka haka rukom kaba dei bala wan ruh ban plie paidbah ïaka mynta ka sngi da u Bah Mayral Born Syiem MLA ka Nongpoh kum u kongsan haka jingdonlang u Fr Michael Khongngain Parish Priest ka Umden Parish, Sr. Angela Marbaniang Head Mistress ka St Peter Secondary School Khuswai, Bah Andreas Kleiñ Chairman ka Managing Committee bad kiwei kiwei ki riew rangbah.
Shuh shuh naka liang u MLA ha katei ka sngi u la aiti ruh ïaka Work Order ba T.5 lakh sha ki bor pynïaid skul ba kin dang lah shuh shuh ban pynbha ïaki jingdonkam katei ka skul lyngba ka skhim pynroi khappud ka Inter State Border Areas Development Program ba kum u MLA u kwah ba ki skul haka thaiñ khappud kin long kiba thikna bad kiba bit ba biang ban pynphriang ïaka jingnang jingstad bad kumjuh ruh kawei ka laptop bad ka Printer.
Ha katei ka sngi naka liang ki bor pynïaid skul haka jingiphuh iphieng kila ioh ruh ban rakhe pyndonburom ïa ki kmie ki kpa jong ki khynnah skul kiba aiti met bad mynsiem ban pynnang pynstad ïala ki jong ki khun ki kti namar ka jingnang jingstad ka dei ka atiar ha kane ka juk ba mynta.
Haba kren ha katei ka sngi naka liang u Bah Mayral Born Syiem kum u kongsan u la ong ba ka jingnang jingstad ka long kaba kongsan ha kane ka juk ba mynta bad kum u MLA u angnud ba ki skul khappud kin long kiba bit ba biang ban ai ka jingshakri kum ki shlem pule, namar ka jingnang ka jingstad ka long kaba kordor ha kane ka juk kaba mynta.
U la pynpaw ruh ka jingsngewkmen kaba khraw ba ha katei ka sngi la ioh ban plie ïaka kamra klas kaba la pynkha thymmai ha katei ka sngi .