Shillong Nailur 14: Ki bor pyniaid shnong jong ka shnong Mawpat ki la pynpaw ïa ka jingsngewkmen hadien ba Select Committee ka KHADC ka la pynhab ïa ka Mawpat ha ka Mawkhar-Pynthorumkhrah Konstiwensi na ka Mawlai konstitwensi.
Halor kane na ka liang u Rangbah shnong ka Mawpat u Bah Juda Wahlang ula pynpaw ka jingsngewkmen namar ba don ki shnong na Mawpat kiba hab mynshwa sha Mawlai bad Laitumkhrah konstiwensi, mynta pat lyngba ka Committee ka KHADC la pynhab noh ïa ka Shnong Mawpat sha Mawkhar-Pynthorumkhrah konstiwensi.
“Ka Dorbar Shnong Mawpat khlem isih ne pyrshah ne ïashun ïano ïano, ka la pynpaw ba ka don ïa ka jingangnud la slem ban pynhab noh ïa ka shnong Mawpat ha Mawkhar-Pynthorumkhrah constituency lane ha kino kino ki constituency kiba hajan ha ka ilekshon MDC jong ka Khasi Hills Autonomous District Council,” ong u Rangbah Shnong.
U Rangbah shnong ka Mawpat u Bah Juda Wahlang ula ong, hadien ba ka shnong ka la ïoh jingtip ba na ka liang ka District Council ka la don ïa ka Delimitation Committee ka ban bishar ïa ki shnong ha ki constituency kiba donkam ban phiah, ka Dorbar shnong ka la phah jingthoh sha kane ka Committee bad kyntu ba kan pyrkhat bad ban pynhab noh ïa ka shnong Mawpat ha ka Mawkhar-Pynthorumkhrah Constituency lane ha kino kino ki constituency kiba marjan.
“Ngi na ka liang ka Dorbar shnong ngi la phah jingthoh bad kyntu ïa kiba kin pyrkhat lem ïa ka shnong Mawpat, namar ka Mawpat ka long kum ka dew lynnong”, la ong u Bah Juda Wahlang.
Katkum ka jingong u Rangbah shnong ka Mawpat, la ong ba ka jingïasnoh bad ka Mawlai constituency ka la long shisha kum kawei na ka Dewlynnong namar la hap ban ïaid lyngba kawei ka constituency bad haba nujor ïa ka jingbun paid ruh kam ïahab shuh bad ka shnong Mawlai, ka jingdon ki nongthep vote ruh ka dang long tang shi troh haba nujor bad ka shnong Mawlai.
U la sngewdei ba ka por ka biang bha ban pyllait noh ïa ka Mawpat ban lah ba pynïasoh bad kiwei ki constiuency. Kan jin da bha ba na ka liang ki MDC kin ïadem lang ïa ka khlieh ba kin ïapyrkhat halor kane.
