Shillong, Jylliew, 17: Ka shnong Mawkhan ka la pynpaw ïa ka jingkmen kaba khraw hadien ba ki la ïoh pdiang ïa ka ïingshnong kaba thymmai kaba la tei ha ka jinglut kaba 10 lak tyngka.
Ïa kane la pynpaw da u Rangbah Shnong ka Mawkhan, Bah Nicholas Kharkongor ha ka jingïalang plie ïa katei ka ïing shnong hynin ka sngi ha ryngkat ka jingdonlang u MLA barim ba dei ruh u Nongai buit jong u Myntri Rangbah ka sorkar jylla, Bah Hamlet Dohling kumjuh ruh ka BDO jong ka Mylliem Block, ka S Verma.
U Rangbah Shnong u la ong ruh ba katei ka ïingshnong kan ïarap haduh katta katta ïa ka shnong namar kin ïoh ban pyntyllun bun ki kam jong ka shnong nalor ba ka long ruh ka burom kaba khraw ba ki la ïoh ïa ka ïing shnong kaba paka na i ïingshnong iba rit ba ki don mynshwa.
Na ka liang u Bah Hamlet haba kren ha katei ka jingïalang u la pynpaw ba u kmen ban ïohi ba katei ka shnong ka la ïoh ïa katei ka ïingshnong kaba u la ïakhun ban pynïoh naduh ba u dang long kum u MLA bad ong ruh ba un ïai bteng ban trei bad ïarap na ka bynta ka jingkiew ha ki shnong ki thaw ha baroh kawei ka constituency.
Ha kane ka sngi la ïoh ruh ïa ka jingkren na ka BDO kaba la pynpaw lang ïa ka jingkmen ba katei ka shnong ka la ïoh ïa ka ïingshnong kaba paka.
