Kmen ka shnong Erpakon ba la mih ki bar jylla da kaba suk napoh ka shnong

Nongpoh, Jylliew 29: Hadien ba ki bar jylla ki la mih lut na ka shnong, kaba dei hadien ka jingkynnoh ba shah pynïap u samla ka shnong, ha uwei u bar jylla, ba ka Dorbar Shnong hi baroh kawei, ka la rai ban nym shah shuh ban wan shong ne seng kam seng jam ki bar jylla, ka Dorbar shnong Erpakon mynta ka sngi ka la pynkut noh ïa kane ka kam, kaba dei hadien ba baroh ki bar jylla kiba shong basah ne kiba wan seng kam seng jam ha katei ka shnong ki la mih lut na katei ka shnong.
Kum ban pynkynmaw, ka Dorbar shnong ka shnong Erpakon ka la rai ban nym shah shuh ban wan shong ban sah ne ban wan sengkam sengjam ki bar jylla, ka dei hadein ba uwei u samla ba la tip kyrteng kum u Kyrmen Lyngdoh Nonglait ha ka 11 tarik u Jymmang 2024, la kynnoh ba u la duh noh ïa la ka jingim, da kaba shah bom shah tied da ki kynja lyntang ha uwei na u Nongtrei ka R.N Sharma Hotel ba la tip kyrteng ruh kum u Raju Rajbhar, ba ki Puit ka Ri Bhoi ki la dep ban kem ïa u.
Haba kren sha ki lad pathai khubor mynta ka sngi, u Bah M. Thongni, Rangbah Shnong ka shnong Erpakon bad u Secretary Shnong, u Bah Lambor Kharshilot bad lem ka jingdon lang ki nongïalam shnong, ki la ong ba ki la dep ban pynmih ïa ka hukum naduh ka 21 tarik u Jymmang 2024 ban kyrpad ïa ki bar jylla ba shong ba sah ha katei ka shnong bad khamtam kiba trei ha ka RN Sharma Hotel ba ki dei ban mih noh mardor namar ka shnong ka la pynbna ba kam kam don shuh ka jingbah khlieh bad dei halor kane ka Nongrim ka shnong mynta ka sngi kala lum biang ïaka Dorbar Pyllun haka shnong Erpakon haka jingdon lang ruh ki trai ba aiwai ïaka ïa ka RN Sharma Hotel.
Shuh shuh, ki la pynpaw ruh ba ka bor shnong ka dap da ka jingsngew kmen ba katei ka jingïalang kala long kaba seisoh bad khylliap lama syndon ïa kane ka jingdon ki bar jylla kiba la mih noh na katei ka shnong, kaba dei hadien ba ki bar jylla ba shongwai ha RN Sharma Hotel kila mih lut na katei ka shnong naduh ka 13 tarik Jylliew, ha kaba ïa kane ka la pyntip da ki trai jaka bad ki la pynpaw ruh ka jingkmen ba ha kane ka shnong mynta la don satang para khasi bad kum ka shnong kala ai khublei ruh naduh ki paidbah, ki kynhun seng bhalang kiba ai ka jingkyrshan ïaka shnong naduh ka Public Rally kaba la long ha katei ka shnong dang shen bad ki la pypaw ruh kum kine ki jingjia kan nym dei shuh ban jia kaba ktah ïa ka shonguk shongsain jong ki paidbah hapoh ka shnong, ki la bynrap.