Mawkyrwat, Lber 30 : Ki paidbah jong ka Shnong Pynden-umjaraiñ bad Wahkaji ki la pynpaw ka jingsngewkmen kaba khraw hadien ba na ka liang jong u nongmihkhmat u la sngew bad sngap ïa ki jingkyrpad jong ki shnong da kaba ula pynïoh ka mang pisa ban tei ïa ki Ïing Dorbar Shnong bad mynta u snem 2026 ki la ïoh ban pyndep ïa ki kumba la mang bad ba kin ïoh ban pyndonkam na ka bynta ban ïakren bad pynbeit ïa ki kam shnong kumjuh ruh kiwei pat ki jingdonkam paidbah.
Ka jingïing Dorbar Shnong ha Pynden-umjaraiñ la tei da ka jingmang pisa kaba T. 10 lak lyngba ka skhim SRWP jong u snem 2023–2024, katba ïa ka ïing Dorbar Shnong ha Wahkaji la tei da ka jingmang pisa kaba T. 10 lak lyngba ka skhim SRWP jong u snem 2024–2025, ryngkat ka jingïarap jingïaisngewbha jong u bah Pius Marweiñ da T. 2 lak tyngka.
Ïa kine ki ar tylli ki Ïing Dorbar Shnong la plie paidbah da u MLA/MDC ka Ranikor Constituency, u bah Pius Marweiñ kum u kongsan bad ha ka jingkren jong u u la pynpaw ba kane ka jingïoh ban plie ïa ki Ïing shnong ka dei lyngba ka jingpynsngew jong ki ba kum ki ki donkam ban don ki Ïing shnong ba paka. Namarkata, hadien ba ki la pynsngew ma u ruh lyngba ka MLA Scheme na ka SRWP u la mang mar T. 10 lak tyngka bad dei lyngba kane ka mang pisa kine ki ar shnong ki la ïoh ban pyndep bad ïoh ban plie paidbah khnang ba kin ïoh ban pyndonkam noh ïa ki.
Ym tangkata, u la pynkynmaw ruh ba ki ïing shnong ki dei ki ïing kyntang jong ka shnong ha kaba ïa kaei ka rai ba mih na ka ki long kiba don nongrim bad treikam ha ka rukom kaba dei, kumta kum ki paidbah nongshong shnong ki dei ban pyndonkam hok ïa ki namar kumba la ai bad la plie ha ka jingphuh jingphieng jong ka rong ka rup, kumta dei ban pynneh ïa ka jingitynnad jong ki Ïing Dorbar Shnong bad wat ai lad ba ki nongwan pynsniew dur kin wan leh dusmon.
Ha kawei pat ka liang, haba kren ïa ki kam pynroi hapoh jong ka konstitwensi, u bah Pius Marweiñ u la ong ba ym tang kine ki Ïing shnong ba u la ai hynrei ki don shibun bah ki kam pynroi ba u la leh bad un sa nang pyndep ha kine ki sngi bad ki snem ki ban sa wan. Namarkata, u la buh ka jingkyrpad ba kum ki paidbah ki dei ban long kiba ïai shah watla bun ki shnong ki la dep pynsngew ïa ki jingdonkam hynrei ban leh shi sien leh ne ai shi sien ai ka long kaba eh ïa u hynrei ki paidbah ki dei ban ai pat ka jingïatreilang khnang ba ki jingthmu ban pyntyllun ïa ki kam pynroi hapoh ka konstitwensi kin long kiba ïaid beit ïaid ryntih.
Ha ka jingïalang ha shnong Pynden-umjaraiñ, la ïadonlang u bah Ondersis Marthong, Deputy Sordar Shnong, u bah Shlurbanshngaiñ Thongni, Secretary Shnong, bad kiwei de ki rangbah shnong. Katba ha shnong Wahkaji, la ïadonlang u Sordar Shnong u bah P.F. Lyngdoh, ki riew rangbah, ki nongkitkam shnong lem bad ki nongkitkam jong ka Wahkaji Sports Club.
Shuh shuh, ha ka jingïalang ha Wahkaji, ka shnong ka la aiti ïa ki dorkhas sha u MLA/MDC bad kyrpad ban pynbha ïa ka surok kaba 2 km, ban ïarap da ki tiar pynsaw (PA System), bad kumjuh ruh ka Wahkaji Sports Club ka la kyrpad jingïarap ban pynbha ïa ka madan ïalehkai bad ban pynbiang ïa ki tiar ïalehkai kriket, namar mynta ka club ka dang hap ban shim wai na kiwei pat ban leit ïalehkai.
