Shillong, Naitung 01: Ka Senvg HNLC ka la pynpaw ka jingsngewkmen ba ka Google ka la ithuh ïa ka Ktien Khasi kum kawei na ki Ktien ban pyndonkam da kane ka Company Internet.
Ha ka kyrwoh ba phah da u Bah Saiñkupar Nongtraw, General Secretary jong ka Seng, ka HNLC ka ong ba kane ka jingithuh ka Google kadei ban long kawei na ki lynti ka sorkar India ruh kadei ban ithuh noh ïa kane ka ktien.
U Bah Nongtraw u la ong ruh ba ka Seng kan trei shitom ban nang pynsaphriang shuh shuh ïa ka jingpyndnkam ia ka ktien Khasi ha kano kano ka bynta khnang ban pynneh pynsah ïa kane ka ktien kaba kordor.
“Ka jingithuh ka Google ïa ka ktien Khasi, kadei ka dak jong ka jingnang ïar bad ka jingnang riewspah ka ktien Khasi”, la ong u General Secretary cum Publicity Secretary ka HNLC.
U la ong ruh ba ka jingkyrpad u Myntri Rangbah ka jylla, u Conrad Sangma ïa ka Google ba kan ithuh lang ruh ïa ka ktien Garo ka pyni ba ki shimkhia tang ïa kawei bad kadei ka kamram jong u ban kyntu ïa ka sorkar India ban ithuh noh ïa ka ktien Khasi bad ka ktien Garo ha ka riti synshar jong ka ri India.
