Shillong, Naitung 11: Ka Excutive commitee ka All Meghalaya Dancers Association (AMDA) ka la pynpaw ka jingsarong bad ka dap da ka jingkmen ba u Bah Kitbok Thabah nongïalam ka AMDA u la ïoh biang ka lad ban long kum u nongbishar ban bishar ïa ki nongshad baroh kawei ka India ïa kaba la tip kum ka All India Dancing championship (AIDC) season 2 ha ryngkat ka Saumya Kamble winner India Best Dancers season 3.
La ong ba u Bah Kitbok Thabah u don shisha ïa ka mynsiem ban kyntiew ïa ki heprit samla donsap ha ka shad ka rwai jong ka jylla Meghalaya bad u ba don mynsiem ban kyntiew ïa ki heprit samla donsap ka thaiñ shatei lammihngi.
“Ngi kyrmen ba u nongïalam jong ngi un dang trei shitom ban kyntiew ym tang ïa ka jylla Meghalaya hynrei un lah ruh ban lumlang ïa ki para donsap ha ka shad ka rwai ka thaiñ North East India,” ong ka kyrwoh na ka AMDA.
Kum ban shu pynkynmaw u Bah Kitbok Thabah u long uwei u ba mihkhmat na ka jylla Meghalaya ha ki rynsan TV ïa kaba la tip ka Dance India Dance season 2 TV round ha u Snem 2009 hynrei mynta pat u la long uwei u païa ba khlaiñ ban pyntyllun bad ban kyntiew ïa ki heprit bad ki samla donsap ha ka shad ka rwai.
