Shillong, Nailur 11 : Ki paidbah nongrep ka thaiñ Sohryngkham, Mawryngkneng bad Mawkynrew ryngkat ka Hill Farmers’ Union (HFU) Sohryngkham Circle ka la pynkup burom ia u Myntri ka tnad kam rep ka Sorkar Jylla, u Bah Banteidor Lyngdoh ha ka jingïalang kaba la pynlong ha Ïing Dorbar Shnong Sohryngkham myn ha ka 09 tarik u Nailur, 2022
Kane ka jingai burom ki nongrep ïa u Myntri ka long halor ka jingshim khia jong u bad ka tnad kam rep jong ka Sorkar ban leh da ki kam ban weng ïa ki jingeh ki nongrep ha ka Jylla.
Ki nongrep bad ki nongïalam ka Union ki la pynpaw ba ka tnad kam rep ka Sorkar Jylla ha ka jingkhmih u Bah Banteidor ka la wanrah ïa ka Farmers’ Commision, ka Farmers’ Day, ka jingpynlong ïa ka Farmers’ Parliament bad ha ki snem ba la leit ka jingshim jingithuh ïa u tyrpad bad u synsar kum ki mar rep.
Ka mat ïakren kaba ha khmat eh ka dei ka jingshim khia ban ïoh pyndonkam biang ïa ka dawai sboh ha ki katto katne ki jaka rep ka Jylla kiba ym long shuh khlem da pyndonkam dawai sboh ïa kaba u Myntri u la shim khia ban leit phah tuklar haduh ki bor bahalor ka Sorkar India.
Nalor kane ki nongrep ki la kdew ba ka jingïarap ka Sorkar da ka song pisa kaba long san hajar tyngka sha iwei pa iwei i dkhot jong ki Producers Group ka long ka jingïarap kaba khraw nalor ki skhim kum ka jingïarap na ki Bank, ki jait symbai mar rep bapher bapher bad kiwei kiwei pat.
Ki la kdew ruh ïa ka jingtrei shitom u Myntri ban ïaleh ban wanrah ïa ki ïew nongrep ha kylleng ki jaka ka Jylla khnang ban kyntiew ïa ka ïoh ka kot jong ki nongrep.
U Bah Banteidor Lyngdoh ha ka jingkren kum u Kongsan u la ïa wer ïa ki nongrep ban long kiba ïa tylli khnang ba yn lah ban weng ïa shibun tylli ki jingeh jong ki nongrep ha ka Jylla.
‘Ki nongrep kiba phong ïa ka juti kaba don prek ki kham sngewthuh khambha ïa ki jingeh kiba ki mad bad kumta ngin ïatreilang bad ïa mir jingmut lang kumno ban weng ïa ki jingeh jong ki nongrep “, u la ong.
Da kaba ai khublei ïa ki nongrep, ki nongïalam shnong bad ki nongïalam ka Union, u la ong ba ki nongrep ha kaba ïa dei bad ka dor ïew jong ki mar rep ruh ki dei ban ïatylli ban lait na ka jingshah khniot beiñ.
