Klumar thlim ka Salt Lake Stadium; Khlem ïohi durkhmat ki paidbah ïa u Messi naba kerkut da ki Heh Sorkar

Kolkata, Nohprah 13: Ka GOAT India Tour u Lionel Messi ha Kolkata ka la wanrah ïa ka jingklumar namar ka jingbym lah ban pynïaid bha bad pynhun ïa ki paidbah ha Salt Lake Stadium ka la pynlong ïa ki hajar ngut ki nongkyrshan ban bitar, ha kaba don ruh kiba la wan hiar shaduh madan hadien ba une u khlur ïalehkai phutbol na Argentina u la mih noh.
Ka bynta ba nyngkong jong kane ka jingwan jngoh ha Kolkata la buh kum ka prokram kaba saw kynta kaba sdang naduh ka por 9 baje mynstep, ha kaba u Shah Rukh Khan u la long kum uwei napdeng ki nongwan jngoh ba kongsan. Hynrei une u aktor Bollywood u la ïakynduh ïa u Messi kham hashwa ha ka por ba la plie ïa u mot jong ka Argentina uba jrong 70 phut, ha ryngkat u Sujit Bose, u Dkhot ka Ïingdorbar ka Bidhannagar.
Hadien kata, u Messi u la wanpoi ha Salt Lake Stadium ryngkat bad ki paralok ba ïalehkai lang jong ka Inter Miami, u Rodrigo De Paul bad u Luis Suarez. La ker sawdong ïa u da u Myntri ka tnad ïalehkai jong ka West Bengal, u Aroop Biswas, u Satadru Dutta, ki nongpynïaid jong ka Mohun Bagan Athletic Club u Srinjoy Bose bad u Debasish Dutta, bad ki pulit.
Bun ki nongpeitkai, kynthup ïa kito kiba la siew dor heh (premium price) ïa ki tiket, ki la ud ba kim shym la lah satia ban ïohi ïa u Messi—la ka long beit beit ne ha ki screen heh jong ka madan—wat la ki la ap da ki kynta. Ka jingker pahara kaba jur bad ka jingdon jong ki politishian bad ki riew pawkhmat kiba shong ha ki jaka peitkai ba pawnam ka la nang khanglad shuh shuh ïa ki paidbah ha Stadium ban ïohi, kaba la pynjur ïa ka jingsngewsih hapdeng ki paidbah.
Katba u Messi u dang ïaid kylleng sawdong ka madan bad u dang kaweh kti ïa ki nongkyrshan, ki paidbah ki la nang bun, kaba la pynlong ïa ki pulit ban shem jingeh ban tehlakam ïa ka jingïalang.
Katba ka jingbitar ka nang jur, ka jinglong jingman hapoh madan ka la nang sniew, ha kaba ki paidbah ki la pynpaw ïa ka jingbitar da kaba pynpra ïa ki banner, bad pynjulor ïa ki jaka shong, bad la bret ïa ki shuki sha madan.
“Ngi la shong ap ha ki khyrdop naduh ka por 8 baje eiei mynstep, bad ka rukom pynïaid kaba bakla da ki nongpynïaid ka la pynsngewsih shibun,” la ong u Sanmoy Saha, u nongkyrshan uba la don ha madan. “Ki la pynsyrwa kai ïa ka por da ka jingshad jong [ka nongrwai Bengali] Aneek Dhar bad katto katne ki jingpynbyrnia bym ler khaw. Nangta, ynda la poi u Messi, ka jingbun ki VIP sawdong jong u ka la pynkordit ïa u ba bun tang ban ïohi.”
Ka jingkynthoh pyrshah ka la tuid sha ki rynsan Social Media, ha kaba ki nongkyrshan ki la kynthoh jur ïa ki nongpynïaid na ka bynta kaei kaba ki la batai kum ka “jingthmu kaba thok” bad “ka jingpynïaid bakla kaba jur.”
“Ngi la siew da ki hajar tang ban peit ïa ki politishian ba ki shondur selfie katba u Messi u jah noh tang ha ki minit,” la thoh uwei u nongkyrshan ha ka rynsan X. “Kane kam dei ka jingpynkulmar jong ki paidbah—kane ka dei ka jingbakla jong ki nongpynïaid,” la thoh sa u wei pat.
U Messi u la thmu ban pynlong ïa ka coaching clinic bad ki khynnah na baroh ki District jong ka West Bengal. Hynrei ha jaka kata, katba nang bun ki briew kiba la tuid ïa ka jaka madan, u nongïalehkai Argentina u la mih noh kloi, kaba la pynbitar ïa ki nongkyrshan kiba la siew haduh Rs. 20,000 na ka bynta ki tiket.
Hadien ba u Messi u la mih noh na katei ka jaka, ki nongkyrshan kiba la bitar ki la hiar thma ïa ki bynta jong ka madan, da kaba bret ïa ki bilor um, pynpra ïa ki poster bad pynjulor ïa ki shuki.
“Ka la sngew kumba ki nongpynïaid ki kwah tang ïa la ki jong ki briew ban ïakynduh ïa u Messi,” ong u Archisman Rakshit, uwei pat u nongkyrshan uba la don lang ha kane ka madan. Nga la ïohi ïa u Suarez ba u shah ñiat.
“Shisien ba u Messi u la leit noh, ngi ruh ngi la rai ban mih noh. Phi lah ban sngewthuh ïa ka jingbitar kaba nangroi, bad ngim kwah ïa kano kano ka jingkulmar,” la bynrap u Rakshit.
Lah ban kdew ba U Messi, un leit sha Hyderabad, ha ka por janmiet, ha kaba un leit ban ïashim bynta lang bad U Revanth Reddy, Myntri Rangbah ka Telangana, ha shwa ba un leit sha Mumbai, ha ka sngi kaba bud. Un pynkut ïa kane ka jingwan jngoh ha New Delhi da ka jingïalang ha madan ïalehkai Arun Jaitley, hadien kata ka jingïakynduh bad u Myntri Rangbahduh ka ri u Narendra Modi.