Jowai, Ïaïong 20: Uwei na ki riew rangbah na ka shnong Moolamylliang East Jaiñtia Hills District u ma Damewanhi L. Rymbai uba dei ruh u Asst. Waheh Shnong ula kloi ban ai ïa ka krem dewïong kaba u khlem da pyndonkam shuh kaba don ha Pynsymroo EJH ba leit theh ïa ki ñiut ba mih na sor Jowai shapoh katei ka krem dewïong.
Ïa kane u ma Rymbai ula ïathuh ha ki nongthoh khubor ha Jowai hadien ba ula dep ban leit soi ïa ka jingïateh Agreement mynta hi ka sngi 20 tarik u Ïaïong, 2022 bad ka tnad Jowai Municipal Board Jowai ba la mihkhmat da ka Chief Executive Office JMB.
Katkum kane ka shithi jingïasoi yn shah haduh shibnai ban pynlong kum ka jaka theh ñiut ba shipor ïa ka tnad JMB hapoh katei ka krem dew ïong bad ïa katei jingïateh la dep ban phah copy kumjuh sha sha u Deputy Commissioner ka East Jaiñtia Hills Khliehriat, kumjuh sha u DC ka WJHD.
Na ka liang u ma Damewanhi L. Rymbai haba pynsngew halor kane da kaba ong kum uwei na ki nongshong shnong uba shait ïadon bynta haka kam paidbah haba ula ïohi ïa ka jinglumthup ïa ki ñiut ha Jowai kaba la ktah ïa ki paibah nongshong shnong, da kawei ka jingmut ula kloi ban ïarap kumno ban pynkhuid ïa kitei ki ñiut da kaba leit theh noh ïa ki hapop katei ka krem dewïong kaba u dang dei trai kaba jylliew kumba 200 phut eiei.
Halor kane u ma Rymbai ula dep ruh ban pyntip shwa sha ki bor jong ka Dorbar Shnong khlem da don kino kino ki jingujor naka shnong, kaba kila ai ha u ïa ka NOC bad hadien kane ka tnad JMB kan tep ïa katei ka thliew bad leh ïa kaba donkam.
Na ka liang u Dr. H.H Mohrmen ula ai ka jingïaroh bad ai khublei ïa utei u riew rangbah uba la kloi bad pdiang ïa ka jingleit theh ïa ki ñiut, ula ong ba kane ka long ka jingkmen ïa baroh lang khamtam ïa ki nongshong shnong ka Jowai ban lait noh na kitei ki ñiut kiba la lumthup da bun bnai ha kylleng ka sor Jowai.
