Kloi palat ki briew ban pynkut nia, pynbudnam sniew khlem da ap ka jingtohkit ki Pulit: Bah Alan

Shillong, Jylliew 06: U President jong ka Meghalaya Rural Tourism Forum u Bah Alan West u la ong ba ka sorkar kadei ban pynbeit janai bha ïa ki rukom pynbeit ïa ki kam jngohkai ha kane ka jylla khnang ba kan long ka kam kaba don ka jingkitkhlieh ym pat ba kan shu long lyngkrang.
U la ong ruh ba ka sorkar jylla kadei ban khmih ruh ïa ka jingsngaiñ jong ki tourist kiba wan nabar bad kumjuh ruh ki lad jingïada ïa ki trai shnong jong kane ka jylla.
U la ong ruh ba ha ka por ba wan lynshop ka khlam Covid ka sorkar ka la ïoh ka jingïatreilang bad ki dorbar shnong bad kumjuh ruh ha ka kam jngohkai kadei ban long kumjuh ba ki dorbar shnong kin hap shim ïa ka bynta kaba hakhmat eh khnang ba kan long ka tourism kaba don ka jingkitkhlieh.
Na ka liang jong u, u la ong ba ki don ki lynti kiba khohruh khoh ram ki bym long kiba shngaiñ na ka bynta kito kiba ïaid lynti nyngkong bad ki nongwan jngohkai ki dei ban shim ïa ki guide kiba dei hi ki trai shnong ba kin batai bad ïalam lynti hynrei ki don ruh pat ki jaka ba ki nong wanjngohkai kim donkam ïa ki nongïalam lynti.
“Ngi kum kiba don bynta ha ka kam jngohkai shang pyrthei hadien ka jinglap ïa ka met jong u Raja ngi long kyndit ba kane ka wanjia ha ka shnong Sohra ka shnong kaba pawnam bha na ka bynta ka jingsuk jingsaiñ ka jingshong shngaiñ, hynrei kane ka ktah bha bad ym sngewlah ban mutdur ba kan wanjia hangne bad na ka liang jong ngi kaei kaba ngi don ban pynpaw hangne ka long ka jingsngewlem ïa ki bahaïing hasem jong u Raja halor kane ka jingjia kaba ym lah ban batai shuh kaba la pynpait dohnud ïa ki bahaïing bad ha kajuh ka por ngi ïeng ruh ryngkat bad ki bahaïing jong ka Sonam ka lok jong u Raja kaba dangjah haduh mynta bad ngi khmih lynti ban ïoh ïa ka khubor kaba bha hynrei kane ka case ka long kaba jwat bha naba ki pulit ruh kim pat lap ksai eiei,” ong u Bah Alan West.
U Bah Alan u la ong ba kane ka jingjia ka la wanrah ka khubor kaba sniew bha ïa ka jylla Meghalaya bad kaba ktah khamtam ïa kiba trei ha kane ka kam jngohkai bad haba peit ha ki rynsan social media la ka long ha Shillong bad ki lad pathai khubor na ri thor ka jylla ka la shah kren sniew bha. “Don kiba ong ba kadei ka jaka jong ki nongtuh nonglute, kiba pynïap briew bad kaba sngewsih bha ka long ba ngi tip ba ka Sohra kadei kaba don ka shongsuk shong shngaiñ hynrei ha kane ka rukom pyrkhat kaba bakla ki briew ki la shu pynkutnia kloi palat ban kynnoh ïano ïano hynrei dei ban shaniah ha ka jingtohkit ki pulit naba ka la thung ïa ka Special Investigation Team dei ban ailad ïa ka ba kan wad ïa ka daw ba sha lyndet jong kane ka jingthmu,” u la ong.
“Ban shu kynnoh ba ki briew napoh ka jylla ki dei kiba donkti ha kane ka kam ka long kaba ym ban pdiang. Ban shu pynkynmaw ïa kawei ka jingjia ha Umsohsun dang shen uwei u briew u la leh khlem akor ïa kawei ka khynnah skul bad ha kane ka jingjia ruh ha ki rynsan social media la mih ka jingkynnoh ba dei kiba na jylla kiba la leh, hynrei ynda la lap hadien dei pynban da u briew uba na Assam, kumta kam dei kaba bha ban shu kynnoh kloi lan ïa kane ruh ka jingjia ha Sohra ban ong ba dei ki briew na jylla kiba leh ïa kane ka kam, naba kane kam shongnia shuh bad kumta ym ban shu pynkut jubor hynrei kaei kaba bha tam ka long ban ap ha ka jingstad ka jingtohkit ki pulit haba ïadei bad kane kam,” u la pynpaw.
U la ong ba ki kam runar ki ju ïai jia hi ha baroh kawei ka pyrthei hynrei kaba sngewsih pat kadei ka jingwanjia ha ka shnong Sohra bad na kane ka jingjia kadei ban pynkyndit bynriew ïa baroh khoit naduh ka sorkar jylla haduh ki nongshong shnong bad ki dorbar shnong ban hap ban kyndit bynriew halor kane ka jingjia.
“Kaei kaba donkam mynta ka long kumno ngin ïaid shakhmat, ban ïada bad ban shim kiwei ki sienjam, naba ine i jingjia mynta in ym pat pynsah dak sniew than bad ki tourist ki dang ïai wan hi haduh kine ki sngi, hynrei lada ka dang ïai jia shi jia kamut kam long kaba bha ïa ka dur ka dar jong ka jylla bad ka thaiñ Sohra bad ka jylla hi baroh kawei bad kaei kaba ngi dei ban leh nangne shakhmat ka long ba ngin hap long kiba stad ban ïada na kum kine ki jingjia,” u la bynrap.
U la ong ruh ba kum kine ki jingjia ki shait jia ha kiwei ki jaka bad ka jingshah kynnoh barabor kadei beit sha ka sorkar jylla bad kumjuh ruh kane kaba la jia ha Sohra ki briew nabar kin beit ïa ka sorkar jylla, kumta ka sorkar kadei ban shimkhia bha haba ïadei bad kane kam.
“Naba ngi ïoh ki jingmyntoi na kane ka kam jngohkai kumta ngi dei ban phai khmat ba kane ka kam tourism kam dei ban long kaba lyngkrang palat bad ba ka tourism jong ngi kadei ban pynthikna ïa ki lad jingïada bad jingshngaiñ ïa ki tourist kiba wan nabar bad kumjuh ruh ka jingshngaiñ ïa ki nongshong shnong ka jylla bad kaba kham kongsan ruh kadei ban phai khmat bha sha ki lad jingïada jong mariang jong ngi,” u la bynrap.
U Bah Alan u la ong ba kaba donkam mynta ka long ka jingïatreilang ha kane ka kam jngohkai naba kane ka la ai kam ïa kiba bun ki samla bad kumjuh ruh na ka bynta ka jingbha jong ka pateng ban wan, kumta kumba ka la long ha ka por ba lynshop ka khlam Covid-19 kumta ruh dei ban don ka jingïatreilang hapdeng ki dorbar shnong bad ka sorkar jylla khnang ba yn ban kyntiew ïa ki kam jngohkai ha kane ka jylla.