Shillong, Jymmang 08: Ka Sorkar Jylla kala pynpaw ïa ka jinglong ba kloi ban pynieng ïa ka khyrdop talasi mynder ha Byrnihat Railway Station, Ri-Bhoi District ban weng noh ïa ka jingsheptieng halor ka jingwan tuid ki briew ba nabar ka Jylla.
U Symbud Myntri Rangbah ka Jylla Bah Prestone Tynsong ila pyntip ba u Deputy Commissioner ka Ri-Bhoi District ula khot ïa ka jingïalang bad ki kynhun sengbhalang bapher bapher lem bad ki kynhun bapher bapher ban ïakren halor ka jingtyrwa ban wanrah lynti rel ha Byrnihat.
“Ka jingsngewkhia jong ki Sengbhalang ka dei ka jingrung ki mynder bad u DC ula batai ha ki ba lada ki kwah ban don ki kynja khyrdop talasi mynder lane Infiltration Check Gate hapoh ka Byrnihat Railway Station, kane ka dei ka kam kaba lah ban leh. Ki bor pynïaid ka Railway kila dep ai ka jingkular ba kum kane hi” ula ong.
Wat hapdeng ka jingkular, ki Sengbhalang ki dang don ka jingartatien, ong u Bah Prestone haba bynrap “Na kata ka daw, ka jingïakren ka dang ïaid shakhmat bad baroh ki kynhun bapher bapher”.
Haba kyli, u Symbud Myntri Rangbah ula ong ba ka Sorkar Jylla ka kwah shisha ban wan ka rel kit mar (goods train) haduh ha Byrnihat hynrei ym ka rel kit briew (passenger train).
“Lada dei ka rel kit mar, kan da long shisha ka jingkyrkhu kaba khraw eh ïa ka Jylla baroh kawei” ula ong.
Lah ban kdew hangne ba ka Sorkar Pdeng kala tyrwa ban wanrah ïa artylli ki project lynti rel ha Jylla ba kynthup ïa kawei kaba 22km na Tetelia haduh Byrnihat bad kawei kaba 108 km na Byrnihat haduh Shillong.
Ïa ka project na Tetelia haduh Byrnihat la buh ban pyntrei ha ka jinglut jingsep ba kot T. 496 klur hynrei kane ka project kala sahteng noh namar ka jingpyrshah jong ki kynhun bapher bapher kiba kwah ka aiñ ban pyrrkhing ïa ka jingwan rung kyrthep ki briew ba nabar ka Jylla.
