Shillong, Nailar 10: Da ka jingpaw ka Mizoram bad ka Manipur ha ka jingïalehkai Commonwealth Games (CWG) kaba dang shu dep, kiba bun ki riew ieit Sports na Meghalaya ki la pynpaw ka jingsngew diaw ba ka Meghalaya da ki phew phew snem kam lah satia ban pynmih ïa ki nongïalehkai ki ban mih khmat ïa ka India kum ha ka CWG, Asian Games ne wat haduh ka Olympic ruh.
Ha ka CWG ba dang shu dep ka la pynmih ïa u Jeremy Lalrinnunga, uba la jop ïaka Gold Medal ha ka Weight Lifting ba 67 Kilo. Nangta ka Lalremsiami, kaba la jop Bronze Medal ha ka jingïalehkai Hockey na ka India ha kane ka CWG 2022 ha Birmingham. Ka Manipur ka la sei ïa ka Mirabai Chanu, kaba la jop ia ka Gold Medal ha ka Weight Lifting ba 49Kilo.
Kine ki la wan phai sha la ïing sha jylla la jong hapdeng ka jingpdiang burom kaba khraw da ki paidbah ka jylla jong ki.
Hynrei ka Meghalaya lait noh na i Kong Matsiewdor War iba la leit ïakhun ha ka jingïakop siat khnam ha ka Asian Games ha ka Seoul ha u snem 1986 bad u Bah Benning Lyngkhoi ha ka Marathon ha ki snem ba kham hadien, kam ju lah ban sei ïa ki Nongïalehkai kiban long ka jingsarong ïa ka jylla ban mihkhmat ïa la ka ri.
Haba ïakren bad ki katto katne ki nongïalehkai Sport barim jong ka jylla, ki la pynpaw ba ka daw ba konsgan kadei ba ka Meghalaya kam kot satia katkum ka jingtreikam kiwei jylla ka thaiñ shatei lammiihngi ha ka liang ka jingïalehkai Sports.
“Ngim pat kot satia ka rukom treikam ha ka liang ka Sport bad kiwei kiwei ki jylla, la ka long na liang ka sorkar ne ka liang ki bor ne ki Seng ne kiba dei ban pynïaid ïa ka Sport”, la ong u nongïalehkai barim ka jylla, u bym kwah ban pynpaw kyrteng ïalade.
U la ong ruh ba ki jingai jingïarap, ka jingbym biang ki madan ne ki jaka ïalehjai kidei kiwei pat ki daw kiba khanglad ïa ka jylla ban pynmih ïa ki nongïalehkai Sport na ka jylla.
Ki don kiba la pynpaw ruh ba ki daw ba ka jylla kam lah ban pynmih ïa ki nongïalehkai ban mih khmat na ka ri, kadei ba ka jylla kam don satia ïa ka Sports Policy kaba biang ka ban treikam na ka bynta kumno ban kyntiew ïa ka Sport ha ka jylla. “Kaei kaba ngi shu ïohi ka long tang ka jingsam jingïarap sha ki Sports Club, ki Association bad ka jingpynheh wat ïa ki jingïalehkai ki bym dei satia ki Olympic Sports’, la ong ki nongïalehkai.
Ki don ruh kiba ai daw ba ki nongïalehkai ka jylla kim shimkhia tang ïa kawei ka jait jingïalehkai, hynrei ki kwah ban nang lut ha jan baroh ki jait jingïalehkai, ïa kaba ka eh than ban long kum ki nongïalehkai ban mih khmat ïa ka ri.
